Killersugaanngitsumik nipisanniartarneq taamaatinneqartussanngorpoq
MSC-mik meqqilersuisoqalernissaa aalisarnermik inuussutissarsiuteqartut kissaatigaat, kalaallit nipisaataasa nungusaataanngitsumik aalisarneqarnerat taamaalilluni uppernarsaaserneqassammat aamma nioqqutigineqartut meqqeqarpata aningaasarsilluaataasinnaassasut naliliisoqarluni.
- Pisuussutinik uumassusilinnik nungusaataanngitsumik tunngaveqarluni atuinissap pisariaqarnera, Europami pisisartunit niuerfinnillu allanit ilisimaneqaleraluttuinnarpoq, Aalisarnermut naalakkersuisoq Finn Karlsen oqarpoq.
- Tamanna tunngavigalugu nunat tamalaat akornanni aalisakkanik tuniniaasartunit aalisarnerup nungusaataanngitsumik tunngaveqarluni ingerlanneqarneranut uppernarsaasersuisoqartarnissaanut avatangiisinillu mianerinnittumik aalisartoqarneranut piumasaqaatit sakkortusiartuinnarput, Finn Karlsen erseqqissaavoq.
Naalakkersuisut taamaattumik piumasaqaatit makkua nalunaarummi allannguutitut ilanngunneqartussatut akuersissutigaat:
Ilaatigut aqutsiveqarfiit ataasiakkaat aalajangersimasunik pisassinneqartalissapput, taakkunanilu ullut aalisarfiusartussat amerlanerpaaffissaannik aalajangersaasoqassalluni.
Tulliatut inuussutissarsiutigalugu nipisanniarniaraanni akuersissuteqartariaqassaaq, taannalu sivisunerpaamik ukiunut marlunnut atuuttussanngorlugu tunniunneqartassalluni.
Akuersissummi makku aalajangersarneqarsimassapput: Akuersissummi ataatsimi qassutit qassit atorneqarsinnaassanersut, sumi aalisartoqarsinnaassanersoq aamma aalisarfinni ataasiakkaani piffissap qanoq ilinerani aalisartoqarsinnaanersoq.