Katuullit oqaluffiat tillinniarfigitittoq
Sapaatit akunnerata naanerani, politiinit eqqissisimakannersutut taaneqartuni, angerlarsimaffimmi eqqissiviilliornerit aqqaneq marluupput, pisiniarfimmi tillinniarneq ataaseq, persuttaasoqarsimaneranik nalunaarutiginninneq ataaseq angerlarsimaffimmullu tillinniarnerit marluk. Tillinniarnerit arlaat Guutip illuanut pisimavoq, tassalu katuullit oqaluffiannut Nuummi Børnehjemsvejimiittumut, tassanilu aningaasanik PlayStation 3-millu tillittoqarsimavoq.
Allattoq Peter Troelsen, Simon Uldum
januaarip 28-at 2013 08:42
Sapaatit akunnerata naanerata eqqissisimaffiuneranut pissutaasut ilagaat piffissami kingullermi tillinniarnerit Nuummi innuttaasut misigisarsimasaasa unitsinneqarnissaat anguniarlugu politiit piareersimasuutitaminnik amerlisaasimanerat.
Taamaakkaluartoq Radiop qaaqqaani Blok 12-imi nujaleriffik tillinniarfigineqarsimavoq. Tassani iPhone ataaseq qarasaasiallu pingasut tillinneqarsimapput. Tillinniat igalaaq aserorlugu isersimapput.
Politiit unnummut kulturisiorfimmut atatillugu innuttaasunit 1300-nit pulaarneqarsimapput. Politeeqarfimmi angallassisoqarpoq, atortorissaarutinik takutitsisoqarluni politiillu sulinerat pillugu aperisoqarsinnaalluni.
