Karoline Nielsen inuusuttuaqqat qaannamik parrunneranni nunarsuarmi sukkanerit arfineq pingajoraat
Karoline Nielsen, qaannamik parrunnermi qallunaat nunanut allanut unammisartuiniittoq, U-18-ni Portugalimi VM-qataareerluni Silkeborgimut angerlarnissamut piareersarpoq.
Tupaallassimaarneq nassataassaasa ilagaat.
AAMMA ATUARUK Qaannamik parrunneq: Karoline Nielsen VM-mut annguppoq
Nunarsuarmi sukkanerit arfineq pingajoraat - tassa 18-it ataallugit ukiullit qaannamik parrunneranni. Siunissami VM-mi ujaminnannissaq anguniarlugu sungiusarnerunissamut piumassuseqarluarpoq.
Foto: Torben Anholm
- Assut ingerlalluarpunga. Nunarsuarmi kakkannerpaat unammivakka taakkunanilu kisimiittarissami sukkanerit arfineq pingajuattut inissippunga sisamaattarissamilu tallimaattut inissilluta, Karoline Nielsen KNR-mut oqarpoq.
- Assorujussuaq naammagisimaarinnippunga aamma misigisaq pikkunaqaaq nunarsuarmi kakkannerpaanut unammilluni, Karoline Nielsen oqarpoq.
18-nik ukioqarpoq taamalu ukiormanna naggataamik U-18-ni VM-qataalluni. Tassani angajulliit ukiumi unammiffiusumi 18-liisussaasarput.
Tupaallapput
Upernaaq qallunaat nunanut allanut unammisartuinut ilannguppoq.
EM-milu peqataareerluni VM-mut peqataasussatut toqqagaavoq taamanikkullu finalemi qallunaat sisamaattarissamik qajaat sukkanerit arfernattut inissippoq. Taamaattumik VM-mi angusarissaarnissamut ilimasussimanngikkaluarput.
- Ilimasunngikkaluaratta. Tassami EM-mi arfernattut inissikkatta sukkanerit arfineq pingajuattut inissinnissarput ilimaginerugaluarparput, Karoline Nielsen nuannaaqisoq oqarpoq.
AAMMA ATUARUK Qaannamik parrunneq: Karoline Nielsen EM-mi finalemut annguppoq
Qajaqatigiilli tallimaattut inissipput - aamma kisimiittarissami tupaallaatigisaminik ingerlalluarpoq.
- Aamma kisimiittarissami ingerlalluartutut imminut nalilerpunga, Karoline Nielsen oqarpoq.
Silkeborgimi sakkortuumik sungiusassaaq
Maanna Silkeborgimut angerlalerpoq tassanilu sakkortuumik sungiusarnissaq tullinnguppoq.
Unammisartutut ineriartornerani alloriarneq tulleq tassaavoq U-23-ni unammisartuuneq neriupporlu suli qallunaat nunanut allanut unammisartuiniissinnaassalluni.
- Aappaagulu suli pikkorinnerulerusuppunga tassanilu U-23-ni peqataanissamut periarfissaqarpunga. Pikkorissilluarsinnaaguma tassani ujaminnattalersinnaavunga, Karoline Nielsen oqarpoq.
Nuummi inunngortuuvoq pingasuinnarnilli ukiulik angajoqqaavi Silkeborgimut nuupput.
Qaannamut maratonimut septemberip naanerani pisussamut aamma toqqagaavoq tassanilu maqittassapput takinerusummullu parrullutik. Qaannamik maratonimi VM Rumæniami pissaaq.
