Kalaallit Trumpip ikinngutaanik aningaasaatilissuarmik ataatsimeeqateqarsimasut maanna akissuteqartut

Nunami kommunit annersaanni borgmesterip, Avaraaq S. Olsenip (IA), aamma Ronald S. Lauderip, Amerikamiup aningaasaatilissuup Trumpimik Kalaallit Nunaannik soqutiginnilersitsisup, ataatsimeeqatigiinnerat tupaallannartutut ajornartorsiutaasutullu saqqummiunneqarpoq.

Ataatsimiinnermulli peqataasut ilaat naapertorlugit, ataatsimiinneq pisortatigoortumik ilisarititsineruvoq.

- Inussiarnisaarluta pulaartoqaannarpugut, kommunemi pisortaq Ole Jakobsen oqarpoq.

Politikki pinnagu inunnik ikiuiniarneq

Aningaasaliiniarnerit politikkiluunniit, nunanut allanut tunngasut nunamilu namminermut tunngasut eqqartorneqanngillat, taanna erseqqissaavoq, naak ataatsimiinnermi peqataasut politikkikkut pissutsit ilungersunartut ilisimalluaraluaraat.

Ole Jakobsenip oqarnera naapertorlugu ataatsimiinneq 'kaageerartuutigaluni kaffisoqatigiiutaa' ilasseqatigiinneruinnarpoq aamma Ronald Lauder Fondenikkoorlugu - kommunimi meeqqanut inuusuttunullu ilaatigut ikiuiniarnermut tunngatillugu oqaloqatigiinneruinnarpoq.

- Aningaasarsiorniarneq pinnagu inuiaqatigiinnik ikiuinissamut tunngavoq, taanna oqarpoq.

Kommuneqarfik Sermersuup pingaarnertut suliassaa, tassa innuttaasut, sammineqarput.

- Meeqqanut inuusuttunullu sutigut iluaqusiisoqarsinnaanera sammineqarpoq, taanna oqarpoq.

Nalinginnaasoq

Ataatsimiinneq borgmesterip ataatsimeeqateqartarnerpassuanut ilaaginnarpoq, kommunimilu pisortap oqarnera naapertorlugu tamanna nalinginnaasuuvoq.

Kalaallit sinniisaasa Ronald Lauderip kalaallit suliffeqarfiutaanni marlunni aningaasaliisimanera naluaat, tamannalu Politikenimi ullut qulit aatsaat qaangiummata allaaserineqarmat paasinarsivoq.

Kommunimi pisortaq isumaqarpoq ataatsimiinneq sivikitsuaraq tunngavigalugu  "annerusumik  inerniliinissaq" mianernartuusoq oqarlunilu ataatsimeeqatigiinnertut taajuilluni saqqummiineq 'ingattarsernerusoq' allaallumi ’isumaliortitsinerulerluni’.

Ataatsimiinnermi isumaqatigiissuteqartoqanngilaq, illuatungeriillu ataatsimiinnerup kingorna attaveqatigeeqqinnikuunngillat.

Immikkoortortami pisortaq borgmesteri, inuttut nammineq pissuteqarluni sulinngiffeqartoq, sinnerlugu allakkatigut akissutimini allappoq, inussiarnisaarluni pulaartoqartarneq 'borgmesterip kommunimut sinniisuunermini nunarsuarmullu attaveqarnermini suliassaasa ilagiinnaraat tamannalu pissusissamisoortuusoq'.

Inuit, peqatigiiffiit soqutigisaqartullu borgmesteri ataatsimiititalianiluunniit siulittaasut allat oqaloqatigiumallugit saaffigiuartarpaat - soorluttaaq Ronald Lauder taassumalu niuertoqataa taamaaliortut.

Tigussaasumik isumaqatigiissuteqartoqanngitsoq aningaasaliissuteqartoqanngitsorlu

Politikkimut tunngasut aalajangersimasut ataatsimiinnermi, minutsit 30-t missaanni sivisussuseqartumi, sammineqanngillat aalajangiiffigineqarnatillu, immikkoortortami pisortaq allappoq.

Taamaattumik tamanna tunngavigalugu imaqarniliortoqanngilaq, kommuni ilisimatitsivoq.

- Kommunip inuit assigiinngitsorpassuit, najukkamiittut, nunatsinneersut nunanilu allaninngaanneersut oqaloqatigiuarpai. Isiginnittariaatsimik eqqartueqatigiinneq kommunillu suliaanik paasititsiniaaneq siunertaavoq.

- Ataatsimiinneq tikeraap isumaanik soqutigisaanilluunniit tapersersuinertut isumalersorneqartariaqannginnera erseqqissaatigineqartariaqarpoq. Kommunip aalajangiussai tunngavilersorluakkamik tamat oqartussaaqataaneranilu killissaliussat atuuttut tunngavigalugit aalajangiunneqartarput.