Kalaallit sulorartartut nunat tamalaat akornanni ajugaasut – sungiusaasoqarunnaarpalli kina piareersimassava?
Guitari innaallagiatortoq nipituvoq.
Albrecht Damgaard Nuummi angerlarsimaffimmini immiussisarfiaqqamini natermiit qilaamut sulorarnermi ujaminik, VHS-inik immiussanik nipilerinermullu atortunik ulikkaartumi nikorfavoq.
Kisimiilluni rockimik appisimaarluni nipilersuummiit nipitunerusumik oqaluunniarsaraanga.
70-inik ukioqarnera arlaleriarluni naammagittaalliuutigillattaareeraluaraa takuneqarpallaarsinnaanngikkaluarpoq. Tassa 70-ileereerpoq. Utoqqanngulereerluni.
Albrecht Damgaardili immaqa taama paasineqarsinnaanerpaavoq.
Timersortartutoqqatuunngitsoq, kisianni inuttut iperaanngisaannarsimasutut.
Nunatsinni sulorartartullammaanerminiilli siumukaatigisimasaminik suli taamak nukissaqartigaaq. Taamanikkorniillu nunatsini sulorartarnermik ingerlatsinermigut ullumikkutut itsilerlugu siumukartitsisimaqaaq.
Timersortarfimmi inuuneq
Albrechtip CV-a imartooq malinnaaffigisinnaagukku kinaanerata oqaluttuarinissaa ajornanngikkaluarpoq.
Taassuma nammineq aamma ajornakusoortilaarpaa. Angutit nunatsinni sulorarnermi ataasiakkaarneranni qasseriarluni pissartanngorpa? Marlukkaarnermimi?
- Inuunera tamangajaat timersornermut tunngangajappoq, Albrecht pissartanngorniuteqataanerminik kisitsiniarsaraluni oqarpoq.
Kisimiinngilarlu. Taassuma nulia Anni isikkammik arsarnermi sulorarnermilu unammisarlunilu sungiusaasarsimavoq, meerartaaramilli ilaqutaqqimini aqutsisunngorluni.
Meeqqat nunarsuarmi sumiiffinnut assigiinngitsunut sungiusariaqataasarnikuupput, sulorarnermillu sungiusaleraangata timersortarfimmut ilaaginnartarsimallutik.
- Inuunerput tamangajaat timersortarfimmiippugut. Kisiannili aamma kinguneqarsimavoq, Albrecht oqarpoq.
- Meeqqakka sakkortuumik piumaffigisimallugit ullumikkut takulluarsinnaavara. Pikkorinnerpaanngornissaannut piumasaqarfigaakka, pikkorinnerpaanngoramillu piumajunnaarput.
Tamanna sungiusaasuunermini arlaleriarluni aamma takusarsimavaa.
- Kajumissutsinnik meeqqanut ingerlatitseqqiigajuppunga. Taakku ajugaappata taava uanga ajugaassaanga. Ataasiarlunga unammisartoq inuusuttoq piumaffigingaarakku qialerpoq unammiumajunnaarlunilu. Tassani uanga nammineq angorusutakka mianersuutilaassallugit paasivara.
Albrecht Damgaardip imminut nunatsinni timersornermi qaffasinnerpaat ilaanniilersitsisoq – allanut aamma sakkortuallaarsinnaasoq paasisimavaa.
Unammilligassat imannaanngitsut ajugaarusussuserlu
Taassuma timersortarfik, meeqqat ajugaanissamullu kajumissuseqarneq nuannersumik oqaluttuaraa. Aamma imminut allanullu ilaannikkut piumasaqarpallaartarsinnaanini. Sunali tassunga pissutaanersoq aperineqarami killitsippoq.
- Unammilligassaaluit, taanna akivoq.
Albrecht Damgaard meeraallunili assigiinngitsorpassuarnik unammillissuteqarsimavoq. Arlaannik pikkoriffeqarnissaminut mikivallaarlunilu tuappallaarsimavoq siutimilu illuanik tusilartuulluni, meeraanermini qinngasaarneqartarsimavoq, pisariaqartitaminillu tapersersorneqarnissaminik amigaateqarsimalluni. Assigiinngitsorpassuarni kingulliujuaannartuusimavoq.
Tamannali ingerlarsornissaanut sunniuteqartuusimavoq. Naleqarnini imminut takutittariaqarsimavaa. Nipilersornermi, timersornermi inuunermilu.
- Naak illuanik tusilartuugaluarlunga imminut oqarfigisarpunga: Nipilersornermik pikkorissunngussaanga.
Nipilersullaqqissivorlu. Nipilersoqatigiinnimi Qarsoq-mi albumit arfineq-marluk CD-llu tunineqartut tusindit arlaliupput.
Sulorarnermilu unammisartagaata Lennart Hansenip sukataartiinnaavippaa. Albrecht nunatsinni sulorarnermi qaffasinnerpaasoq Lennart Hansen Danmarkimit 1. divisionimit takkuteriataarpoq, taakkulu marluullutik 80-ikkunni 90-ikkunnilu pissartanngorniunnermi unammisaqattaarput.
- Ukiut sisamat tallimalluunniit ataannartumik ajugaaffigisarpaanga. Uanga 2-juaannarlunga. Imminulli oqarfigisarpunga: Ajugaaffigissavara! Ajugaaffigaaralu. Sisamariarlunga tallimariarlungaluunniit ajugaaffigaara!
Ukiut 20-t sungiusaasuullunilu maligassiuisuusoq
Naallu Albrechtip sulorarnermi anaalerut atorpallaarunnaarsimagaluarlugu suli tunuanngilaq. Timersornermillu suli ingerlatsisuulluni.
Taanna ukiut 20-t sinnerlugit Nuummi timersortarfimmi meeqqanut inuusuttunullu B67-inut sungiusaanissaminut piareersimajuaannarpoq – teknikki unamminermillu paasinninnissaq kisiisa pinngagit – aammali akisussaaffeqarneq ataatsimoornerlu pillugit.
- Angajoqqaarpassuit meeqqatik naalanngitsut uannut tunniuttaraat misigisimavunga. Uangalu ukiuni arlalinni perorsareeraangakkit aggerlutik qujasarput. Malittarisassanik pissuserissaarnermillu angajoqqaaminnit ilikkanngisaminnik ilinniartarput.
Taassuma oqaluttuani tulluusimaarutigalugu killitsissutigaa. Meeqqallu sungiusarsimasai ullumikkut ingerlalluarput.
- Meeqqat atugarliortut sakkortuunik nalaataqarsimasut, taanna oqarpoq. Meeqqat avatangiisini pitsaanngitsuni periarfissarpassuaqaratillu peroriartorsimasut. Timersortarfimmut nakangallutik iseraangamik – arriitsunnguamik qiillakkiartulertarput. Kingornalu ilinniagaqalerlutillu suliffittaartarput. Ineriartorlutik atugarissaalerlutillu.
Meeqqallu suli takkuttarput. Aamma piffissaq unammiffiusoq naammassereeraluartoq. Aamma naak Albrecht siffiaasalersillunilu seeqqui nungullartut unammisarfimmiittussaajunnaareersimagaluartut.
- Uannut qunusiarineqarlutik nuannarisimassavaat, illarluni oqarpoq, qullinilu malunnaarsaarluni allarterlugit.
Timersuut siuariartortoq, siunissaali qularnartoq
Nunatsinni sulorarnermik nunanut allanut unammisartut Skotlandimi Orkneyip qeqertaaraanni Island Gamesertoqarnerani peqataareerlutik pingasunik ujamiuserlutik nunatsinnut uteqqeqqammerput. Unammeqataasullu arlallit inuusuttuupput Albrecht Damgaardip sungiusaasuuffigisimasai.
Sulorarnermillu nunammisartut nunat tamalaat akornanni unammiuaarneri tamangajaasa – ujamilerlutik nunatsinnut utertarput.
Taava timersuutip siunissaa qaamanngila?
- Qaqugu toqussanersunga apeqqutaavoq, taanna oqarpoq.
- Kalaallini sulorarnermi qaffasinnerpaamik ilinniagaqarpunga. Pikkorivissortunut sungiusaanissamut kisiartaallunga pikkorissarnikuuvunga. B67-imilu kisima tassani ilinniartitsisinnaallunga.
- Pikkorissaanernut pitsaasunut aningaasassarsisoqanngippat uannut taarsiisussamik nassaartoqanngeratarnissaa ernumassutigaara. Danskimik ilitsersuisumik maanngartitsissapput, imaluunniit Danmarkimut taamani uattulli pikkorissartitsiartussallutik.
Tamatumami tungaanut ingerlarsuinnassaaq.
- Inuugallartillunga, Annillu inuunerani ingerlaannassaagut – taassumami B67-p aningaasaqarnera unammiuaarnerilu aquttarpai.
Albrechtip meeqqat 100-t tungaanut ukiut 20-t tungaanut sungiusarpai. Taakkunannga arlallit Skotlandimit kuultiiserlutik angerlariartorput.
Kikkulli tamarmik taama periarfissaqarneq ajorput. Kalaallit timersortartorpaaluit nunanut allanut unammiuaarnissanut aallartinnissai akissaqartinneqartuaannanngilaq.
- Isumaqarpunga timersuutinut politikikkut tapersiisoqartarunnaarnera ajorluinnartoq. Aningaasaliissutit aningaasallu amigaataapput. Isikkamik arsartartunilluunniit unammiartortitsisoqarsinnaanngilaq. Namminersorlutik Oqartussanit aningaasaliisoqartariaqarpoq. Aamma kommunimit.
Aningaasaqarneq Albrecht Damgaardip ernumassutaani initungaatsiarpoq, tamannali nunatsinni sulorartarnerup siunissaanut kisimi ilungersunanngilaq. Naammi ujaminnattoqartaraluartoq unamminermilu takutitsilluartoqartaraluartoq timersuut pisariaqartumik sammineqarpallaarneq ajorpoq.
- Sulorarneq danskit suli timersuutigineruaat. Nunatsinni timersuutini allarpassuarni kalaallit amerlanerusarput. Sulorarnermi agguataaqqanerupput.
- Taperserneqannginnerujussua tupigusuutigisarpara. Island Gamesimi kuultinnassimanerput taaneqarpianngilaq. Kisianni immaqa suli danskit timersuutiginnarnerpaat?
Ileqimisaartorpoq. Qanormi akimmifeqassagami, taanna aperivoq.
- Arlalippassuariarlunga takusarpara. Nukappiarannguaq Maniitsumeersoq klubbimut ilanngukkuni qallunaajaqqamillu naapitsilluni. Oqaloqatigiissinnaanatilluunniit. Unammilerlutilli. Taava ikinngutigiilerlutik. Inuunermik sinnerani. Suna ajornartorsiutaassava?
Timersortartoq pokaaliutilik – kingorngussaq saviminermik nallernissaqanngitsoq.
Albrecht Damgaardip pissartanngorniuffigisani naggataani tamaasa katiterlugit kisippai.
Angutini ataasiakkaarnermi aqqanileriarluni, doublemi 16-eriarluni, mixed doublemi ataasiarluni Kalaallit Nunaanni pissartanngortarnikuuvoq. Ajugaaffigineqarsinnaasut tamakkerlugit ajugaaffigalugit, Kalaallit Nunaanni 1979-imi pingasoriaammik pissartanngorpoq.
1979-imi pingasoriaammik pissartanngorneq Albrechtip qularnanngitsumik angusaasa annerpaartarigaat qularnanngilaq, taanna oqaluttuarpoq. Taamani Veteran-DM-imi angutit marlukkaarnerini qallunaaq nunanut allanut unammisartuusimasoq peqatigalugu pissartanngornertik eqqaassanngikkaanni. 45-nik ukioqarallarami. Tamanna tulluusimaarutigeqaa, taanna oqarpoq.
Pissartanngorniunnerimmi amerlaqaat. Aallarnisagaali suli angineruvoq.
Kalaallit Nunaanni sulorartarnermik ukiut qulikkuutaat marluk sinnerlugit siuarsaavoq, piumassuseqarnikkut, uummateqarfigineratigut – namminerlu oqarneratut unammilligassarpannguillu.
Naak siffialukkaluarluni, isigisai taamanitulli ikkunnaaraluartut suli piumassuseqarnera ersarippoq.
Piumassuseq. Angusaqarluarusussuseq. Eqinnaassuseqarneq.
Pingaarnerpaagunartutullu: Ingerlatitseqqiinissamik kajumissuseqarneq.
