Kalaallit Nunaat kuultinnattoq: Sulorarnermi sekundi kingullerpaami ajugaaneq

Orkneyip qeqertaaraanni Island Gamesertoqarnerani Kalaallit Nunaat Savalimmiullu sulorarnermi ajugaaniutivillutik unamminerini pissanngattoqaqaaq.

Sisamassaannik unammereernerini 2-2- qqapput, angutillu marlukkaarnerini aalajangerneqassalluni – naggataatigullu Kalaallit Nunaat ajugaavoq.

- Naligiittorujussuupput. Unammisut 2-2- qqallutik angutit marlukkaartussanngorput. Unnukkuuvoq taamaattumillu hallimi isersimasut tamakkerlutik malinnaapput, taamak unammiuaarnerni KalaallitNunaata peqataanerani attveqaqatigiinnermut akisussaasoq Uiloq Mathæussen oqarpoq.

Tamanna sioqqullugu Kalaallit Nunaat angutini arnanilu ataasiakkaarnermi ajugaanikuupput, taamaannerani Savalimmiut arnani marlukkaartuni mixed doublemilu ajugaapput.

Taamaattumik angutit marlukkaarnerini pissanganaqisumik aalajangerneqartussanngorpoq, tassani Kalaallit Nunaat sættimi siullermi 15-21-mik siuaqqavoq, kingornalu sættip tulliani pointialunnik siuarluni unamminerup naammassinerani ajugaapput. 

Kalaallit Nunaat Savalimmiunut unammisoq

Savalimmiut nettit iluatungaaniinnerat pissanganermut annikilliartuutaanngilaq.

- Ajugaaniutivinnermi Savalimmiut unamminissaat naatsorsuutigereerparput. Aamma taamaappoq. Taakkumi unammillertitta annerpaartaraat pikkoreqalutillu, Uiloq Mathæussen oqarpoq.

Island Gamesimut aaqqissuisuusussat Savalimmiut, aamma Orkneymut inuit 170-it missaanni amerlatigisunik aallartitaqarput – tamanna aamma savalimmiormiorpassuit isiginnaartut issiaviini illersuisut malugineqarsinnaavoq.

Taamaakkaluartoq unammiuaarnerni Kalaallit Nunaat ukioq manna siullersaalluni medaaliannappoq.

Sulili amerlaninngorsinnaapput. Unammiuaarnerimmi tallimanngornerup tungaanut suli ingerlanneqassapput, kalaallit timersortartut sulorarnermi, arpannermi, nalunnermi, golfernermilu unammisaqattaartussaapput.