Kalaallit Nunaannut ministeriusimasup Tom Høyemip (CD) kisitsisit eqqunngitsut saqqummiunneqarnerarlugit nunamut namminermut peqqissutsimullu ministereqarfik nutaarsiassaqartitsivillu Ritzau sakkortuumik isornartorsiorpai.

Tamanna Radio IIII-mi allaaserineqarpoq.

Kalaallit arnat 1960-ikkunni 70-ikkunnilu akuersissuteqarnatik spiralilersorneqarsimasut taarsiiffigineqarnissaat qulakkeerniarlugu Naalakkersuisut Folketingimilu amerlanerussuteqartut pingasunngornermi isumaqatigiissuteqarmata isornartorsiuineq pivoq.

Nunamut namminermut peqqissutsimullu ministeriaqarfimmit tusagassiuutinut nalunaarummi, Ritzau-p kingusinnerusukkut issuagaani, allaqqavoq kalaallit arnat 4500-t missaanniittut taarsiiffigineqarsinnaasut.

Kisitsilli tamanna isumaqanngilluinnarpoq kanngunartuullunilu, Tom Høyem spiralit pillugit oqallinnermi akulikitsumik peqataasartoq oqarpoq.

Taassuma oqarnera naapertorlugu spiralilersuinermi kalaallit arnat 200-300-t taamaallaat piumavallaarnatik naartunaveersaatinik spiralilersortissimapput.

Arnat sinneri, arnat 4.000-init amerlanerusut, kajumillutik spiralilersorneqartut, taanna Radio IIII-mut oqarpoq.

- Nunamut namminermut peqqissutsimullu ministeriaqarfimmit Ritzau-millu tusagassiuutitigut nalunaarut kanngunartuliornerulluinnarpoq. 4.500-t tassaavoq kisitsit ingasattajaartoq, oqallinnermilu kisitsisinik tunngavissaqanngitsunik ilanngussinikkut akerleriittoqarnerulerpoq, taanna oqaluttuarpoq.

Taarsiissuteqarnissamut suliaq

Kalaallit arnat 143-nnaat spiralilersuinermut tunngatillugu misissuinermut ataatsimiititaliamut siorna saaffiginnittut Danmarkilu inuit pisinnaatitaaffiinik unioqqutitsinerarlugu eqqartuussivimmut suliassanngortitsisuusut, Tom Høyemip maluginiarpaa.

Taakkua Danmarkip Kalaallit Nunaanni peqqinnissaqarfimmut 1992-ip tungaanut akisussaanerata nalaani piumassuserinngisaminnik spiralilersorneqarput.

Taamaattumik Tom Høyem isumaqarpoq kisitsisit tusagassiuutinut nalunaarummiittut soraarsitsinermik kinguneqartariaqartut.

- Ministeriusimasutut aperigumma, taava atorfilik (ministeriaqarfimmiittoq) siunissami allamik suliaqarnissaanik qinnuigissavara. Aamma tusagassiortuusimasutut tusagassiuutillu ileqqussatigut najoqqutassiat pillugit atuakkiortuusimasutut aperigumma, taava sulisoq taanna  apeqqusiinani ingerlatitseqqiinnartoq soraarseqqullugu Ritzau qinnuigissavara.

Isumaqatigiissutigineqareersoq naapertorlugu arnat 4.500-t tamarmik immikkut 300.000 koruuninik taarsiiffigineqarsinnaapput, piumasaqaatit arlallit naammassineqarpata.

RADIO IIII-p Ritzau-mi pisortat oqaaseqartinniarsarivai.