Kalaallit Nunaannut ministeriusimasup inuiannik nungusaasoqarsimaneraaneq pillugu suliaq unitsikkaa

Kalaallit Nunaannut ministeriusimasup Tom Høyemip Múte B. Egede (IA) ullumikkut Aningaasaqarnermut Naalakkersuisuusoq, eqqunngitsumik pasilliineranut eqqartuutitinniarunnaaginnarpaa.

Høyemip eqqartuussissuserisua Dan Shefet Politikenimut taama oqaaseqarpoq.

Kalaallit niviarsiarartai arnartaalu illissakkut naartunaveersaaserlugit spiralilersorneqarnikuuneri Múte B. Egedep Danmarki inuiannik nungusaasimanerarlugu decembarimi oqaatigaa, taanna peqqutigalugu eqqartuussivimmut suliassanngortitsiniarneraaneq aallartinneqarpoq.

Ministeriaqarfiup atorunnaarsinneqannginnerani Tom Høyem Danmarkimi Kalaallit Nunaannut kingullerpaalluni ministeriuvoq.

Innarliisimaneq inuiannillu nungusaaneq pillugu oqaatsit Politikerit ataatsimut isiginninnerat “peqquserlunnertut” Berlingskemut taassuma taanikuuaa.

Naalagaaffiup inissisimaffigisaanut isornartorsiuineq

Naalakkersuisoqatimi eqqartugassap qaqinneqarsinnaaneranut pisinnaatitaaffeqarnera illersorlugu, Naalakkersuisut siulittaasuat Jens-Frederik Nielsen (D) sisamanngormat tusagassiuutinut nalunaaruteqarpoq.

- Naalakkersuisut ernumanartoqartippaat politikkikkut oqaaseqarnernut tunngatillugu eqqartuussivilersuussiniarnermik qunusaarineq. Naalakkersuisut isumaqarput Tom Høyem sammisap iluani toqqaannartumik pineqanngitsoq. Isornartorsiorneqartut tassaapput iliuuserineqarsimasut aammalu naalagaaffiup inissisimaffigisimasaa – inuit ataasiakkaat pineqanngillat, taama allaqqavoq.

Oqaaseqaallu taannarpiaq inuttut Tom Høyemimut tunngatinneqanngilaq, Centrum-Demokraternemi ministeriusimasuugunartulliuna piumasani pisimagaa, Dan Shefet Politikenimut oqarpoq.

Spiralilersuisimanermi suliani arnanut pisortatigoortumik utoqqatseriartorluni ministeriuneq Mette Frederiksen (S) septembarimi Kalaallit Nunaanniippoq.

Kalaallillu Naalakkersuisui akisussaaffimminnik akuersipput Jens-Frederik Nielsenilu tamatumunnga utoqqatsertuuvoq.

Nassuiaasoqarnissaa utaqqimaarneqartoq

Nunamut Namminermut Peqqissutsimullu ministereqarfik suliamut nassuiaammik septembarip aallartinnerani saqqummiivoq. Kalaallit niviarsiarartai arnartaalu ikinnerpaamik 4070-it 1970-ikkut naajartorneranni spiralilersorneqarsimasutut nalilerneqartut takuneqarsinnaavoq. 

Arnat 143-t piumassuserinngisaminnik spiralilertittut, Danmarki inuit pisinnaatitaaffiinik unioqqutitsisimasutut eqqartuussivimmut sassaqquaat. Arnat ataatsimut 43 millionit koruuninik taarsiiffigineqarnissartik piumasaraat. Suliarli suli naammassineqanngilaq.

Danmarki Kalaallit Nunaata peqqinnissaqarfiini 1992-i tikillugu akisussaasuuvoq. 

Danmarkip iliuuserisaa spiralilersuisimanermut sulianut tunngatillugu, inuiannik nungusaasimanertut isigineqarsinnaanersoq pillugu naliliisoqarnissaanik kalaallit naalakkersuisui utaqqimaarput.

/ritzau/