Pinngortitaleriffik: Kalaallit Nunaanni tuttoqatigiit ingerlalluarput

- Misissuineq pingaarnertut Amerikap avannaanut tunngassuteqartoq pillugu Pinngortitaleriffik naliliivoq issittumi tuttut qanoq inneranik nutaarsiassaqanngitsoq.

Aalisarnermut, piniarnermut nunalerinermut imminullu pilersornermut naalakkersuisoqarfik tusagassiorfinnut taama nalunaaruteqarpoq.

Issittumi tuttut - pingaartumik Amerikap nunavittaata avannaani - ikileriarujussuarnerat Københavnip Universitetiata nutaamik misissuinerata inerniliukkaa KNR-imi aggustip qaammataani oqaluttuaraarput,  nunarsuup kissatsikkiartornerata Issittumi tuttut amerlassusaat appariartissagaat oqaluttuaralutigu.

Taamatulli ineriartortoqarnera nunatsinnut atuutinngilaq. Aalisarnermut, piniarnermut, nunalerinermut imminullu pilersornermut naalakkersuisoqarfik tamanna paasiniarlugu Pinngortitaleriffimmut saaffiginnissuteqarsimavoq, misissuineq Kalaallit Nunaanni tuttoqatigiinnut qanoq attuumassuteqarnersoq paasiniarlugu.

- Misissuineq pingaarnertut Amerikap avannaanut tunngassuteqartoq pillugu Pinngortitaleriffik naliliivoq issittumi tuttut qanoq inneranik nutaarsiassaqanngitsoq, naalakkersuisoqarfik allappoq.

Kalaallit Nunaanneersummi tuttut timip kingornussaanut tunngasumik ilanngussisoqarsimarpasinngitsoq naalakkersuisoqarfik naliliivoq, naatsorsoriaatsit statistikimut tunngasut tuttoqatigiit assigiinngitsut annertussusaannik, katitigaanerannik agguaannerannillu paasissutissanik imaqanngitsut imaluunniit naasoqassutsip piffissap ingerlanerani allanngorneranik siulittuutinik imaqaratik, naalakkersuisoqarfik allappoq.

Tuttut pingaartumik Amerikap avannaaniittut pillugit nutaarsiassat ajuusaarnaraluartut, tuttut nunatsinnuuttut pillugit nutaarsiassat ajunnginnerusut naalakkersuisoqarfiup maanna nalunaarutigaa:

- Kalaallit Nunaanni Issittumi tuttut uumaffigisinnaasaannik inuit pilersitaannik ajornerulersitsisoqarnikuunngilaq mikisukkuuttaanngorlugillu immikkoortitsisoqarnikuunani, tuttoqatigiillu taakku aalaakkaasuupput ingerlalluarlutillu. Kalaallit Nunaanni nunaminertat maannakkut sermeqqasut silap kiatsikkiartornerata aatsissavai tuttullu uumaffigisinnaasaat taamaalillutik tikikkuminarnerulissapput, Pinngortitaleriffik tusagassiutinut nalunaarummi naliliivoq.