Kalaallit inuusuttut Naalagaaffiit Peqatigiit ataatsimeersuartitsinissaannut qaaqqusaasut
Nunarsuatsinni nunat inoqqaavi pillugit ataatsimeersuarnisamut, Naalagaaffiit Peqatigiinnit aaqqissuunneqartumit, Nunanit Issittunit inuusuttut qulit peqataassussanngorput, Canada World Youthimit immikkut aningaasaliiffigineqareerlutillu.
Allattoq Apollo Jeremiassen
septembarip 15-at 2014 09:06
Nunat Inoqqaavi kingullermik, Norgemi illoqarfimmi Altami ataatsimeersuarnerannit inaarutaasumik nalunaarusiaat, ima qulequtserneqarsimasoq, "Nothing about us without us", uagutsinnut tunngasut aalajangiinerit pillugit uagut aalajangeeqataassaagut, taama kalaallisut paasineqarsinnaasoq, ukiaru ataatsimeersuarnermi Nunat inoqqaavisa illersugassaat sammineqassaaq.
Inuusuttut qulit Alasakamit, Canadamit, Chukotkamit aamma Nunatsinneersuussapput. Nunatsinniillu aallartitassat tassaassapput inuusuttut pingasut tassaasut, Ail Liimakka Laue, ICC-mi ilaasortatut peqataasussaq, Vivi Vold aamma Tikaajaat Kristensen.
World Conference on Indigenous Peoples ukunani malittarineqarsinnaavoq wcip2014.org aammalu facebookikkut.
