Kalaallit Arctic Winter Gamesimi peqataatitassaannik Iceland Air toqqaannartumik timmmisartuussissaaq
Whitehorsemi marsimi Arctic Winter Gameseqarnissaani kalaallit peqataasussat toqqaannartumik Nuummiit Whitehorsemut timmisartuunneqassapput. Kingullermik Alaskami Arctic Winter Gameseqarneranut sanilliullugu tamanna pitsanngoriaataavoq taamanikkut arlaleriarluni timmisartut taarsertarlugit uiartererujussuarneq ajornakusoornartorsiorfiummat.
Kalaallit Nunaanni timersoqatigiit kattuffianni GIF-mi siulittaasoq aamma Travel By Heartimik piginnittoq Elise Bruun qanittukkut atsioqatigiipput kalaallit 2026-mi Arctic Winter Gamesimi peqataasussat angallanneqarnissaat pillugu.
Isumaqatigiissummi ilaavoq Nuummiit Whitehorseimut toqqaannartumik Iceland Air timmisartuussissasoq peqatasussallu sineriammiit Nuummut angallannerat Air Greenlandip isumagissagaa. Taamatut aamma angalassisoqassaaq Arctic Winter Gamesimi ikumatitaq Whitehorsemi qaminneqareerpat.
- Eqqaalaassavara Air Greenland aamma attavigineqarnikuummat taamatuttaarlu timmisartuutileqatigiit Canadameersut aamma neqerooqataarusuttut. Iceland Air akimik pitsaanerpaamik neqeroorpoq aamma Air Greenland siusissukkut ilisimatitsivoq attartukkamik toqqaannartumik Whitehorsemut timmisartuussinissamut timmisartussaqartitsinani, Claus Nielsen KNR-imut oqarpoq.
Ataqatigiilluarneruneq
Isumaqatigiissusiornissaq GIF-mi pingaartillugu suliarineqarpoq.
2024-mi Alaskami Arctic Winter Gameseqarmat Iceland Airip timmisartuussiffigisagai atorlugit angalasoqarpoq. Siullermik Nunatsinniit Islandimi Keflavikiliarput tassanngaanniillu USA-mi Seattlemut timmisartortoqareersoq aqqutip sinnera Alaskami Anchoragemut aamma timmisartortoqarluni.
Angalaneq taanna ullut unnuallu marluk missaliorlugit sivisussuseqartoq aqqutaani timmisartumut ilaaffissamut tullermut utaqqinnerujussuarnik nassataqarpoq taamaattumillu kalaallit timersoriat qasoqqaqalutik Alaskamut apuupput.
Maanna GIF aamma peqatasussat unammersuarfiusussamut toqqaannartumik angalanissamut qilanaarput uiarterisoqartussaajunnaarmat aqqutimmi naliginnaasut atussagaanni ullut unnuallu marluk missaliorlugit angalasoqartussaagaluarmat. Maanna pisariinnerusumik piffissartornannginnerusumillu angalasoqartussanngorpoq.
- Tamanna pingaaruteqartorujussuuvoq. Timmisartut aqqutaani taarseqattaarnerat qasunartorujussuuvoq, Claus Nielsen arlaleriaqaluni Arctic Winter Gamesimut angalaqataasareersoq oqarpoq.
- Maanna aqqutaani sinittoqarsinnaavoq ataatsimoornerlu misigalugu unammiffissamut angalasoqarluni. Naatsorsuutigissavarput nalunaaquttap akunneri arfinillit arfineq marluk timmisartornissarput tassanilu ataatsimoornerup misiginissaanut periarfissaqarluarpoq tamannalu pingaaruteqartaqaaq unammiuaarnerni taamatut ittuni peqataanerni, Claus Nielsen oqarpoq.
Arctic Winter Gamesimi ammaanersiorneq marsip arfineq pingajuat 2026 pissaaq tassanilu timersortartut 2.000-nit amerlanerusut issittumeersut peqataassapput.
Kalaallit peqataasussat decembarip aallaqqaataa nallertinnagu toqqarneqareersimassapput.
