Kalaallit aalisariutaat Islandimi ikkarlittoq

Kalaallit aalisariutaat uuliamik aniatitsinngilaq.

Islandimiut tusagassiorfiat, visir.is sisamanngornermi unnukkut taama nalunaaruteqarpoq.

Royal Greenlandimmi aalisariutaa, Masilik Islandimi illoqarfiup Vogarip qanittuani sisamnngornermi unnukkut ikkarlippoq. Aalisariut nunanit 500 meterinik ungasitsigisumiinnermini ikkarlippoq.

Aalisariut tallimanngornermi ullaakkut ulinnganerani umiarsuarmit allamit kalitsilluni aniguivoq, Reykjavikkillu kujataani umiarsualiviliarluni.

Aalisariut 52 meterinik takissuseqartoq 12 meterinillu silissuseqartoq, 18-it missaannik inuttaqarluni Tunup Islandillu akornanni aalisartarpoq. 

Aalisariut Islandimi misissorneqassasoq

Royal Greenlandip oqarnera naapertorlugu Masilik inuttallu umiarsualivimmi taliffissaqalernissamut utaqqipput, taamaalillutik pisaminnik tunitsisinnaassallutik.

Aalisariut nunatta nalunaaqutaa naapertorlugu 15.40-p missaani ikkarlippoq, inuttallu tamatuma kingorna islandimiut sinerissami alapernaarsuisuinut attaveqarlutik. Royal Greenlandip aalisariup arriitsumik ingerlanermini ikkarlittoq nassuiaatigaa.

Inuttat ilaat aaneqarput, ilaalli ulinnerani aniguinissaminnut aalisariummiiginnarput.

Aalisariut maanna umiarsualivimmiippoq, Royal Greenlandillu Masilik misissulerpaa, Royal Greenlandip attaveqaqatigiinnermut pisortaa, Masaana Egede oqarpoq.

- Maanna ajoqusernerata annertussusaa naliliiffiginiarparput. Uuliamut puttasumik assiaquteqarpugut, uuliakoortoqarneranulli takussutissaqanngilaq.

- Islandimiut sinerissami alapernaarsuisuisa suleqatiginerat nuannaarutigaarput, Masaana Egede oqarpoq.