Jørgen Boassen minutsialuit ingerlanerini tusaamaneqalerpoq. Nunarput pillugu paasititsiniaalluni maanna angalasoq
Jørgen Boassen kavaajani ammatillugu ukiakkut issittumi pisulluni aggersoq takuneqarsinnaavoq, Donald Trump Amerikamiut erfalasuata saavani assani eqeqqatikkaa assitaliunneqarsimasoq tujuuluaraani takuneqarsinnaavoq. Assi Amerikamiut præsidentiata siutimiut eqqorneqarluni siorna juulimi pinerleeriarfigineqarneranneersuuvoq. ‘American Badass’ tujuuluaqqami allaqqavoq.
Tujuuluaraq taanna nunatsinni politikkikkut pissutsini aamma Danmarkimut ullumikkut atassuteqarnermi nammineq isornartorsiungaatsiakkamini misigisimasani pillugit piffissami kingullermi angalalluni saqqummiiartoqattaarnermini atoqattaangaatsiarpaa.
Jørgen Boassen USA-mi Washingtonimut Floridamullu aggustimi septembarimilu qaaqquneqarpoq, tassanilu atuarfinni, ilisimatusarfinni massa aallaaniartartut klubbianni ataatsimi saqqummiivoq. Poltiikerinit, inuinnaat sunniiniarlutik suliniarfiinit, evangelistinit kristumiunillu qaaqquneqarsimalluni, Boassen oqaatigaa.
- Kalaallinut pissutsit aamma nunatsinni naak nammineq nunagigaluarlugu Danmarkimit assigiinngisitsiffigineqarnerput pillugit saqqummiillungalu oqaluttuarpunga. Danskit tamarmik taamaattuunngillat, kisianni aaqqissuussineq taama aaqqissuussaavoq. Suliffissaqarneq kalaallinut immikkoortitsiffiuvoq, kalaalerpassuillu neriuutaarunnikuupput.
- Spiralilersuisoqarsimanera aamma meeqqat Danmarkimut aallartinneqarsimasut aamma kalaallit meerartaannik Danmarkimi pinngitsaaliissummik arsaarinninnerit pillugit aamma oqaaseqartarpunga. Inuit uissuummingaatsiartarput, taanna oqarpoq.
KNR-ip Jørgen Boassen angalanermini sunik oqariartuuteqarnersoq paasisaqarfiginerulerniarlugu Københavnimi novembarip qaammataani naapippaa. Boassen Nuummi suli najugaqarpoq, piffissamili kingullermi danskit illoqarfiisa pingaarnersaanniilluni, taassuma oqarnera naapertorlugu tassannga nunarsuarmut angalanissaq ajornaanneruvoq.
Amerikamiunit pisuunit aningaasaliiffigineqartoq
Jørgen Boassen Qaqortumi peroriartorfigisimasamini ’Trumpip erneratut’ ilisimaneqarpoq. Taassuma Amerikamiu, pisoorsuaq Trump præsidentitut ukioq manna januaarimi ivertinneqaqqittoq 2016-imi præsidentioqqaarneraniilli illersulerpaa.
Naallu Jørgen Boassen nunatsinni politikkimut attuumassuteqarpallaanngikkaluarluni nammineq qarmaasutut suliffeqarfiuteqarsimavoq. Boassenili præsidentip ernivissuata Trump Jr.-ip Nuummi Mittarfimmut januaarimi tikinnerani qaqortumik annoraalerluni tikilluaqqusinini pissutigalugu nunatsinni tamarmi ilisimaneqalerpoq.
- Nunarsuarmi tusaamaneqartoq, Jørgen Boassen ukioq ataatsip ingerlanerani susimaneranik KNR-imit aperineqarami naqqiivoq.
- Ukioq pisoqarfiungaatsiarpoq, kisianni tamanna Kalaallit Nunaannut innuttaasunullu pitsaasuuvoq. Nunarsuarmi tusarneqarnissatsinnut oqaluttuarisaanermi aatsaat periarfissaqarpugut.
- Trump præsidentimut qinersinermi ajugaasimanngikkaluarpat taama inissisimanavianngikkaluarpugut. Nunatsinni danskillu aaqqissuussineranni ilungersuutissarpassuaqarpugut, taanna oqarpoq.
Jørgen Boassenip nunarsuarmi tusarneqarnissaminut periarfissaq atorluarpaa. Tamanna allaat inuuniutigilerlugu.
Taanna oktobarimi Kroatiamiippoq, tassanilu ataatsimeersuarnermi ‘Make Europe Great Again’-imik (MEGA) oqaasinnaaqarfiusumi oqalugiarluni. Ataatsimeersuarneq politikkikkut talerperliuniartut peqatigiiffiannit “Patrioter for Europa”-mit aaqqissuunneqarpoq.
Eqimattat sinnerlugit saqqummiiartortarpit, imaluunniit imminut sinnerlutit oqaluttarpit?
- Uanga kalaallillu namminiilivikkusuttut aamma namminneq kinaassuseqarusuttut sinnerlugit oqaluttarpunga, Jørgen Boassen akivoq.
Angalanerit qanoq aningaasalersorneqarpat?
- Amerikamiut kristumiullu angalasussaagaangama ikiortarpaannga. Taamaalillutik bilitsimik pisisarlunga, taanna oqarpoq.
Amerikamiut pisuut qanoq ittut?
- Niuertarfiit talerperliunerusuneersullu. Aamma kristumiut ilaannit ikiorneqartarpunga. Kroatiami Make Europe Great Again-imeersut ilaannit aningaasaliiffigineqarpunga, Jørgen Boassen oqarpoq, taannalu aningaasaliisut kinaassutsiminnik isertuussinerat pissutigalugu atiinik taasisinnaannginnerarpoq.
Aningaasaliinerit politikkikkut imaluunnit namminerisamik aningaasaliiffigineqarpat?
- Kalaallit inuinut aamma namminerisamik tapersersuineq ilaapput.
Saassunneqarneq toqunneqarnissamillu sioorasaarneqarneq
Naallu Boassenip ukioq nunatsinnut pitsaasuusorigaluarlugu ukioq nammineq inuunerminut aamma pisoqarfiungaatsiarnerarpaa. Taanna nunatsinni saassunneqarlunilu toqunneqarnissamik sioorasaarneqarsimavoq.
- Ilaquttakka pillugit ernumassuteqarnerpaavunga. Uanga isummakka pineqarlutik taakku isumaat pineqanngillat, inuit tamanna paasissavaat.
Jørgen Boassenip arlaleriarluni saassunneqarsimanini oqaatigaa. Ilaatigut Nuummi imerniartarfimmi Daddy’s-imi.
- Nuuk Centerimi sutorniartarfinnilu qiterlimmik takutitsiffigineqartarpunga, aalakoortunit aamma orninneqarlunga oqaasipiluffigittarlunga .
Taassuma uumissuiffigineqarluni allagarseqattaartarluni aamma oqaatigaa.
- Qanoq allaffigisimagaannga takugaluarukkit amiilaarnartorujussuupput.
Qanoq allaffigisarpaatsit?
- Uani mikrofonikkut oqaatigisinnaanngilakka, kisianni amiilaarnaqaat, assuaripput killiffissamillu qaangiingajallutik. Aamma arlaleriarlunga toqumik siorasaarneqarnikuuvunga, kingullermik septembarimi marlunnik siorasaaruteqarfigineqarpunga, taanna oqarpoq.
Jørgen Boassenili sakkortuumik saassunneqarlunilu uumissuteqarluni allagarsisaraluarluni tamanna oqaaseqarnissaminut unissutigissanagu aalajangiusimanerpaa.
- Ersinngilanga. Tunniutiinnartissinnaanngilaannga, Boassen oqarpoq.
Nunarpulli Danmarkimut inuulluaqqusilluni USA-mut iliginnilernissamut immikkut ittumik maanna periarfissaqartoq taanna isumaqarpoq.
Donald Trumpimmi nunatsinnik sammisaqalerneranit nunarput pillugu pingaarnertut nutaarsiassiarineqaqattaarpoq, tusagassiorfinniillu politikerinillu nunatsinnukakaasoqarluni.
Boassenip sammineqarneq nutaaq nunatta namminiilivinnissaanik kinguneqarsinnaassasoq neriuutigaa.
- Inuiattut namminerlu akuerineqarnissarput namminerlu naalagaaffeqalernissarput takorluugaraara. Taamaalilluta USA iligilersinnaavarput, Manerassuarmi Cookøernetulli aamma qeqertatulli allatulli illersornissamillu oqartussaaffimmik alliliisoqarsinnaagaluarpoq, taakku Amerikamiut naalakkersuisuinit aningaasannattarput. Aningaasarpassuarnik, taanna oqarpoq.
Sakkutuulersuisoqassannginneraraa
Trumpilli allattoqarfiata samminninneranit nunatsinneersut tamarmik nuannaarutiginngilaat. Amerikamiut præsidentiata USA-p Nunarput arlaatigut pissarsiariumaaraa qularutiginagu marsimi oqaatigimmagu nunatsinni aatsaat taama angitigisumik akerliussutsimik takutitsisoqarpoq.
Inuppassuit Trumpip oqaaseqarneranut akerliunerminnik takutitsiniarlutik Nuummi aqqusinikkut Erfalasorput tigummiarlugu marsip 14-ianni ingerlaaqatigiipput.
Jørgen Boassen Trumpip nunatsinni sakkutuulersuussinissamik atuisinnaanera itigartitsissutigisinnaanagu oqaaseqarnera ilinnut ernumalersitsinngila?
- Kalaallit Nunaannik tigusiniarluni pissaanermik atuiniarnera J.D. Vancep (præsidentip tullersortaata) Panamami ikerasaliamut tunngassuteqartoq oqaatigisarpaa.
Kisianni Trumpip Kalaallit Nunaannik tiguaanissaq itigartitsissutiginngilaa?
- Aap, aap, kisianni tusagassiortut nalunngilatit. Apeqqummut ataatsimut tunngaannarpoq, aappaanullu Kalaallit Nunaat ilaanani. Tamanna J.D. Vancep oqaatigisareerpaa, taamaammat ernumassutissaqanngilanga. USA-mi pitsaanerusumik iliuuseqarfigineqarlutalu tikilluaqquneqarpugut.
- Danskit tunuarsimaartorujussuullutillu matoqqasuupput. Kaffisoqatiginiaraanni qaammatit pingasut sioqqullugit isumaqatigiissuteqarfigineqassapput. Tamatuma saniatigut naggueqatigut Canadamiillutillu Alaskamiipput, uagullu Amerikap nunavissuartaaniilluta.
Trumpip nunatsinnik aqutsilernissamik itigartitsinnginnerani USA-p qaninnerusumik suleqatigilernissaanik oqariartuuteqarlutit angalanerit Kalaallit Nunaanni inuit ilaasa naammagisimaanngikkaat paasisinnaaviuk?
- Soorunami paasisinnaavara, kisianni ilisimasaqannginneranuna.
Taamaappat Kalaallit Nunaat Trump præsidenteralugu namminersortunngorsinnaasoraajuk?`
- Aap.
Nunatta Danmarkillu akornanni pisunik oqaluuserinnipputit. Kisianni USA-p aamma nunat inoqqaavisa akornanni pisunik aamma isornartoqarpoq. Trumpip Kalaallit Nunaat ajunngitsumik pissagaa ilimagaajuk?
- Ukiorpassuit matuma siorna pisut pereerput. Nunat inoqqaavi illersorneqarput aamma immikkut nunaliussani tamani immikkut ittumik pisinnaatitaaffeqarput.
Taava USA-mi Alaskamilu nunat inoqqaavi ajunngitsumik pineqarsoraatit?
- Soorunami. Illersugaapput. Uagut illersugaanngilagut, danskitut pinngitsaaliissummik innuttaassuseqartinneqarpugut, taanna oqarpoq.
Tapersersuingaatsiartoqartutut misigisimagaa
Naallu Jørgen Boassen sioorasaarneqarsimagaluarluni nakuuserfigineqarsimagaluarlunilu tapersersorneqangaatsiarluni aamma misigisimavoq.
- Qinersinerup kingorna pingaartumik. Sianerfigineqarlungalu allaffigineqartarpunga. Nuummi pisukkaangama orninneqarlunga oqarfigineqartarpunga “qujanaq sinnerluta oqaaseqaravit”, “qujanaq pillugu ilungersuutiginnikkavit”, taanna oqarpoq.
Taassuma oqarnera naapertorlugu nunatsinni Trumpimut tapersersuisut amerlaneruleriartorput. Inuillu ikinnerpaamik 500-usut eqqoriarpaa.
-Kalaallit Nunaata namminiilivinnissaanik ilungersuutiginnittorpassuusut piffissap ingerlanerani takusarparput, kisianni taakku assuarineqartarput, ilaatinneqarneq ajorput, peqatigiumaneqarunnaartarlutillu. Taakku pillugit oqaluttuassarpassuupput, taanna oqarpoq.
MAGA-mik ingerlataqarneq nunatsinni aamma anneruleriartorpoq, Boassenip oqaatigaa, taannali suli aaqqissuunneqanngilaq. Taassumali aaqqissuussineq nammineq aallartinnissaa isumaliutersuutigaa.
- Inunnik ilinniartitaqarusuppunga, taakku upperisaminnik sorsuutiginnissinnaalissapput, taanna oqarpoq.
