Kalaallit Nunaannut iluaqutissamik nunatsinni Danmarkimilu inuit tuusintilikkaat akerliussutsimik arfininngormat takutitsineranni, Amerikamiut præsidentiat tusagassiorfiutimini Truth Socialimi allappoq. Tassani USA-p Kalaallit Nunaannik tiguaannginnissaanik, nunat Danmarkimik nunatsinnillu tapersersuisut quiassuaatigai. Akitsuusersuinikkut pillaanermik sioorasaarineruvoq.

Naalakkersuisunut siulittaasoq Jens-Frederik Nielsen ataasinngornermi ullaap tungaa maanna qisuariaateqarpoq.

- USA-miit kingullertigut oqariartuutigineqartut, ernumasaarinerit akileraarusersuinerillu, pingaartitanut allannguisinnaanngillat. Naqisimaneqarnianngilagut. Oqaloqatigiinnerit eqqortut, ataqqeqatigiinneq aamma nunat tamalaat akornanni pisinnaatitaaffiit ataqqillugit ingerlanissaq aaliangiusimavarput, taanna allappoq.

Danmarkimut nunanullu allanut februaarip aallaqqaataanit atuutilersumik 10 procentimik akitsuusiisoqassasoq, Trumpip arfininngormat neriorsuutigaa. Nunat allat pineqartut tassaapput: Norge, Sverige, Frankrig, Tyskland, Tuluit Nunaat, Holland aamma Finland. Nunat taakkua tamakkerlutik nunatsinnut tapersersuisuupput, aamma sakkutuunik atortussanillu tamaanga nassiussiniartut – nassiussereernikut.

Nunat taakku amerlanersaat danskit aqutaanni sakkutuut sungiusarnerat “operation Arctic Endurance”-mi peqataassallutik ullualuit matuma siorna nalunaarput. Danskit sakkutuut amerlanerit "amerlangaatsiartunik ilanngussinertut" oqaatigineqartut nunatsinnut ullumikkut tikinnissaat naatsorsuutigineqartoq, TV2 ataasinngornermi ullorornerani allappoq. Sakkutuut danskit sakkutuuinut ineriartortitsinermut maanna pisumut ilassutaassapput.

Bruxellesimi Natomik ataatsimeeqateqarneq 

Issittumi Sakkutooqarfimmi pisortap Søren Andersenip, danskit sakkutuui 100-t missaanniittut Nuummut, amerlaqataalu Kangerlussuarmut tikissimalereersut kalerriutigereerpaa. 

Naak Trumpip Issittumi illersornissaq annertunerusoq ujartoraluaraa – taamaattumik Kalaallit Nunaat aqulerusullugu oqartoq – nunat sakkutooqarnerulernermut tunuliaqutaasut 10 procentimik akitsuusersuinikkut pillarniarlugit maanna sioorasaarpai. Akitsuut 25 procentinik juunip aallaqqaataani ilaneqassasoq arfininngormat nalunaarutigaa.

- Akitsuut Amerikamiut Kalaallit Nunaannik "pissarsinissaata" tungaanut atuutissasoq, Truth Socialimi allappoq.

Nunanut allanut tunngasunut Naalakkersuisoq Vivian Motzfeldt (S) danskillu illersornissamut ministeriat Troels Lund ullumikkut Bruxellesimiipput. Illersornissamut isumaqatigiissuteqartoq Natomi allattaaneq Mark Rutte Issittumi sillimaniarneq pillugu ataatsimeeqatigissavaat. 

Motzfeldtip Nunanut allanut tunngasunut ministeri Lars Løkke peqatigalugu USA-p præsidentiata tullersortaa J.D. Vance USA-llu nunanut allanut tunngasunut ministeria Marco Rubio Washington D.C-mi sapaatip-akunnera kingulleq ataatsimeeqatigaat.

Tassani illuatungeriit suleqatigiissitaliornissaq isumaqatigiissutigaat, naak Kunngeqarfiup USA-llu akerleriissuteqarnerannut, isumaqatigiinnginnermut tunngaviusunut iluarsiissutissanik nassaarniarfiusussaasoq. 

Løkke Europami angalasoq 

Lars Løkke Norskit nunanut allanut tunngasunut ministeriat Espen Barth Eidemit tapersersortissarsiorluni ippassaq Oslomiippoq. Taassuma Løkke, Kalaallit Nunaata siunissaa pillugu apeqqummut, Norskit Kunngeqarfimmut tapersersuisut, naak Trumpi akitsuusersuinermik pillaaniarluni sioorasaaruteqaraluartoq neriorsorpaa.

Løkke Tuluit ministeriunerat Keir Starmer ataatsimeeqatigiartorlugu ullumi Oslominngaanniit Londonimut aallassaaq. Stockholmimut svenskit ministeriunerat Ulf Kristersson sisamanngorpat tikeraassavaa. 

Ataatsimiinnerni tamani Issittumi pissutsit oqaluuserisassani pingaarnerpaapput.

Eqqaamallugu, nutaarsiassat pingaarnerit sukkasuumik Liveblogitsinni malinnaavigisinnaagakkit: