Issittumi Tunngaviusumik Ilinniarfimmi ilinniartut amerlineqaqqittut

Issittumi Tunngaviusumik Ilinniarfimmi ilinniartut amerlineqarnissaat illersornissamut ministereqarfiup naalakkersuisullu isumaqatigiissutigaat.

Allattoq Mads Lynge

februaarip 03-at 2026 14:53

Illersornissamut ministeri Troels Lund Poulsen(V), nunanut allanut naalakkersuisoq Vivian Motzfeldt(S) sapaatit akunnerata naanerani Nuummiipput.

Utoqqarmiut Kangerluarsunnguanniillutillu GUX-imut ilaatigut pulaarput.

Issittumi Tunngaviusumik Ilinniarfimmut atatillugu nutaarsiassamik tassani aamma saqqummiussaqarput.

Naalakkersuisut Danmarkip illersornissamut ministereqarfimmik marlunnik immikkoortortalimmik siorna isumaqatigiissusiorput.

Issittumi Tunngaviusumik Ilinniarfimmi ilinniartut aallartittartut 22-nit 30-nut amerlineqarnissaat tassani januaarimi isumaqatigiissusiortoqarpoq.

Tassanilu ilinniartutut aallartittartut amerlineqarnerunissaat maanna aamma isumaqatigiissutigineqarpoq.

Issittumi tunngaviusumik ilinniagaq suua?

Upalungaarsimaneq sakkutuutullu piginnaasaqarneq ukkataralugit ilinniarfik
Ilinniarfik Danmarkip illersornissamut ministereqarfianit 50 millionit koruuninik aningaasalersorneqarpoq.
Ilinniarfimmi ilinniarneq ukiup affaanik sivisussuseqarpoq. Ilinniartut ilinniarnermik ingerlanerata naggataani Danmarkimi Sakkutuuni Imarsiortuniissapput.
Ilinniartut Illersornissamut ministereqarfimmit akilerneqartunik akissarsisassapput, nerisassaqartinneqartassapput inissaqartinneqarlutillu.
Ilinniartutut akuerineqassagaanni silassorissutsimut misilitsissapput. Misilitsissut kalaallit oqaasiinut kulturinnullu tulluarsagaassaaq. Tamatuma kingorna qinnuteqartut ataasiakkaarlutik nalilersorneqassapput, peqqissutsimullu misissortissimasussaallutik.
Ilinniarfimmi naammassineq politiinngorniarfimmut Illersornissaqarfimmilu ilinnialernissamut isissutaasinnaavoq.

Tigusiffik: Issittumi Sakkutooqarfik

Allisiguk

Ilinniartut amerlanerusut

Danskit naalakkersuisui Naalakkersuisullu qanimut suleqatigiillutik Issittumi tunngaviusumik ilinniartitaanermi tiguneqartartut 2026-p aasaaneranit ilinniartunit 30-nit ilinniartunut 50-inut amerlillugit nukittorsarneqarnissaa aalajangeraat, Illersornissamut ministereqarfiup naalakkersuisullu tusagassiorfinnut nalunaarummi allaaseraat.

Inuusuttut amerlanerusut tassani ilinniarsinnaalernerat nuannaarutigalugu, Vivian Motzfeldtip tusagassiuutinut nalunaarummi tassani oqaatigaa:

- Inuusuttut amerlanerugaluttuinnartut Issittumi tunngaviusumik ilinniarnermik ingerlatsinissamik toqqaasarnerat tulluusimaarutigaara. Tamanna ilinniartitaanerup pitsaasuuneranik, inuusuttattalu nunatta inuiaqatigiillu isumannaatsuunerannut akisussaaffimmik nukittuumik tigusinissamik kissaateqarnerannik takutitsivoq, naalakkersuisoq Vivian Motzfeldt oqarpoq.

Aamma atuaruk Aaja Chemnitz: Illersornissamut isumaqatigiissutip pingajussaanut kissaatikka aajuku

Amerlanerusut ilinniartunngorsinnaanerat illersornissamut ministerip aamma nuannaarutigaa:

- Kalaallit inuusuttut taama amerlatigisut Issittumi tunngaviusumik ilinniartitaanermi tiguneqarnissamut qinnuteqarumanerat sapiaassuseqarnerallu pitsaasorujussuuvoq. Taamaammat kalaallit inuusuttut suli amerlanerusut ilinniarsinnaanermut iluatsilluarsimasumut periarfissinnissaat qanittukkut nuannaarutigaara, illersornissamut ministeri Troels Lund Poulsen oqarpoq.

Isumaqatigiissutip immikkoortuisa pingajuat

Kalaallit Nunaata illersorneqarnissaanut isumaqatigiissutip immikkoortuisa pingajuannik isumaqatigiissusiorumanini Aaja Chemnitzip(IA) KNR-imut siorna novembarimi oqaatigaa.

Issittumi Tunngaviusumik Ilinniarfimmi aallartissinnaasut 80-inut amerlineqarnissaat tassani kissaatigaa.

Kalaallit Nunaanni Sakkutuutut Umiartortutut Ilinniarfimmik pilersitsisoqarnissaa taassuma aamma kissaatigaa.

Issittumi Tunngaviusumik Ilinniarfik pillugu isumaqatigiissusiaq isumaqatigiissutit immikkoortuisa avataatigut isumaqatigiissusiorneruvoq.

Illersornissaq pillugu isumaqatigiissutip immikkoortut pingajussaannik ilaneqassanersoq naalakkersuisut Danmarkimilu naalakkersuisut suli oqaaseqarfiginngilaat.

Suliniutit allat

Ilinniartut amerlineqarnissaasa saniatigut Issittumi Tunngaviusumik Ilinniartitaanerup nutaamik immikkoortoqalernissaa aamma isumaqatigiissutigineqarpoq.

Dronenik minnernik ingerlatsisinnaanissamik ilinniartitsisoqarsinnaalernissaa pilersaarutigineqarpoq, upalungaarsimanikkut sulisoqarsinnaalissalluni.

Illersornissaqarfiup Kangerlussuarmi illutaasa hangariisalu aserfallatsaalinissaat pillugu aningaasaliisoqarnissaa Danmarkimi naalakkersuisut nunatsinnilu naalakkersuisut taassuma saniatigut isumaqatigiissutigaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.