Israelip sakkutuuisa Gazami saassussisarnitik nangikkaat

Israelip sakkutuuisa Gazami saassussisarnitik nangippaat.

Israelip illersornissaqarfia tallimanngornermi ullaakkut taama nalunaaruteqartoq nutaarsiassaqartitsiviup Reutersip allaaseraa. Israelip Hamas sakkuaakkunnaarallarnissamik isumaqatigiissummik taassuma saniatigut unioqqutitsinerarpaa.

Gazamit raketinik saassussinerit Israelip tallimanngornermi ullaakkut pakkersimaarsinnaasimagai, Israelimi illersornissaqarfiup ilisimatitsissutigaa.

Israelimiut timmisartut atorlugit saassussisut, nutaarsiassaqartitsiviup AFP-p tusagassiortuisa ilaata oqaatigaa, soorlu aamma Gazap illoqarfittaani eqqartoqartoqartoq.

Israelip timmisartui Hamasip Gazami inissisimaffiinik tallimanngornermi saassussisut, Israelip illersornissaqarfiata tallimanngornermi ullaakkut nammineq nalunaarutigaa.

Israelip Hamasillu akornanni sakkuaakkunnaarallarnissamik isumaqatigiissut Israelimi tallimanngornermi ullaakkut nalunaaqutaq arfineq-marlunut atorunnaarpoq, tassa nunatta nalunaaqutaa naapertorlugu unnuaq nalunaaqutaq pingasunut.

Sakkuaakkunnaarallarnissamik isumaqatigiissutip ullormik ataatsimik sivitsorneqarnissaa illuatungeriit isumaqatigiissutigisimagaat aviisip The Wall Street Journalip sisamanngornermi unnukkut allaaseraa.

Sakkuaakkunnaarallarnissamik isumaqatigiissutip atuuffiata sivitsoqqinneqassanersoq Israelip Hamasillu suli nalunaarutiginngilaat.

Hamasip sallunaveeqqutitut tigummiaasa ilaat sisamanngornermi iperagaammata, sallunaaveeqqutitut tigummiarneqartut katillugit 105-it maannamut iperagaaasimapput, Israelimiullu taarsiullugu Palæstiinamiut 240-t parnaarussivimmit iperarsimallugit. Nutaarsiassaqartitsivik Reuters taama allappoq.

Sakkuaakkunnaarallartoqarnera iluaqutigalugu ikiorsiissutit Gazamut pajugutigineqarsinnaasimapput.