Israelimiut atorfilittaasa ilaat: Gazami sakkuaakkunnaarallartoqarnissaanik isumaqatigiinniarnerit naammassipput
Gazami sakkuaakkunnaarallartoqarnissaanik Egyptenip illoqarfiisa pingaarnersaanni Kairomi isumaqatigiinniarnerit naammassineqartut, Israel isumaqarpoq.
Israelimiut qaffasissumik atorfilittaasa ilaat ippassaq sisamanngornermi taama oqartoq, nutaarsiassaqartitsivik Reuters allappoq.
Israelip sakkutuuisa illoqarfimmi Rafahmi Gazamilu sumiiffinni allani saassussisarneri nanginneqassasut, atorfilittap atiminik saqqummiusserusunngitsup oqaatigaa.
Islamisiortut Hamasimeersut sakkuaakkunnaarallarnissamik isumaqatigiinniarnerni siunnersuutaasa ilaannut Israelip isumaqatigiinniartitaat nangaassuteqartut, atorfilittap oqaatigaa.
Israelimiut timmisartuutaat malersuutit qamussuillu sorsuutit Rafahmi sumiiffinni arlalinni ippassaq sisamanngornermi saassussipput.
Gazami sakkuaakkunnaarallartoqarnissaa Israel, Hamas, Egypten, USA Qatarilu Kairomi marlunngormalli isumaqatigiinnialerput.
Isumaqatigiissitsiniat sakkuaakkunnaarallarnissamik siunnersuutaannut tapersersuinertik, Hamasip sapaatit akunnerata massuma ingerlanerani nalunaarutigaat.
Israelimiut sallunaveeqqutitut tigummiat iperagaanissaat, palæstiinamiullu arlallit Israelimi parnaarussaaqqasut iperagaanissaat ilaatigut siunnersuutigineqarpoq.