Iranip USA sakkuaakkunnaarallarnissamut isumaqatigiissummik unioqqutitsinerarlugu akiniaaniarluni sioorasaarutigigaa

Iranip USA-p umiarsuaq assartuut kangerluup nerukinnerani Hormuzimi saassummagu, nunat taakkua marluk akornanni sakkuaakkunnaarallarnissamik isumaqatigiissummik unioqqutitsinerarpaa.

Iranimi sakkutuut qullersaqarfianni oqaaseqartartoq Khatam al-Anbiya taama oqaluttuarpoq.

Oqaaseqartartup taamaaliorneq pinerlunniarnertut taavaa.

- Iranimi Islamikkut Kunngiitsuuffimmi sakkutuuisa qisuariaateqangajalernerat, Amerikamiullu sakkutuuisa sakkulersorlutik umiarsuarnik pinerlunniarnerannut akiniaanissaat aarlerisaarutigaarput, oqaaseqartartoq Iranimi tusagassiorfiit naalagaaffimmut atassuteqartut naapertorlugit taama oqarpoq.

Umiarsuaq Kinamiit Iraniliartilluni USA-mit unitsinneqartoq, oqaaseqartartoq paasissutissiivoq.

Amerikamiut sakkutuuisa imarsiortut umiarsuaq assartuut "Touska“ sapaammi tiguarpaat. Umiarsuaq assartuut Iranip erfalasuanik erfalasoqarluni angalavoq.

Aarlerisaarutit tulleriit arlallit

USA-p sakkutuuisa qullersaqarfiata Centcomip nalunaarnerat naapertorlugu, umiarsuaq Iranimeersoq Bandar Abbasimut Iranimiittumut angalavoq.

Amerikamiut sakkutuui assartuutip maskiinaqarfianit qimarngussuinissamik peqqusinnginnerminni, akunnerni arfinilinni aarlerisaareqattaarsimagaluarput. 

USA-p sakkutuuisa Iranimiut umiarsuaataata assartuutip maskiinaqarfia tamatuma kingorna saassuppaat, sakkutuullu imarsiortut umiarsuaq tiguarpaat, Centcom inuit attaveqaqatigiittarfianni X-imi allappoq.

Iranimiut sakkutuuisa Amerikamiut umiarsuai sorsuutit, tusakkat naapertorlugit, dronenik tamatuma kingorna saassuppaat, Iranimi nutaarsiassaqartitsivik Tasnim allappoq. USA-p Amerikamiut umiarsuaatai saassunneqarsimanersut  ilisimatitsissutiginngilaat.

Sakkuaakkallarunnaarneq

USA Iranilu sapaatit-akunnerini marlunni sakkuaakkallarunnaarnissartik qanittukkut isumaqatigiissutigaat. Isumaqatigiissut pingasunngornerup unnuaanut killeqarpoq.

USA-p kangerluup nerukinnerani Hormuzimi angallanneq, umiarsuarnut Iranip umiarsualiviinit angalasunut umiarsualiviullu tungaanut angalasunut, ataasinngornermi matuaat.

Kangerluup nerukinnerani Hormuzip  Persiap Kangerliumarnga Omanillu Kangerliumarnga atassuserpai.

Kangerluup nerukinnerani inuinnaat angallataannit umiarsuarnillu USA-p, Israelip Iranillu sorsunnerata nalaanni angallavigiunnaarneqarpoq.  Amerikamiut Israelimiullu Iran februaarip naanerani saassummassuk sorsunneq aallartippoq.  

Nunarsuarmi uuliap 20 procentia kangerluup nerukinneratigut nalinginnaasumik assartorneqartarpoq. Taamaattumik kangerluup nerukinneratigut angalasinnaajunnaarneq pissutigalugu  nukissiuutit akii nunarsuaq tamakkerlugu akisorput.

/ritzau/Reuters