Iran Amerikamiut sakkutooqarfiinut arlalinnut saassussisimanerartoq

Iranip sakkutuuisa Amerikamiut Jordanimi, Kuwaitimi Bahrainimilu sakkutooqarfiinik saassussisimanertik pingasunngornerup unnuaani nalunaarutigaat.

Iranip naalagaaffiata tusagassiiviisa nutaarsiassiinerat naapertorlugu IRGC taama nalunaaruteqartoq, nutaarsiassaqartitsivik Reuters allappoq.

Dronet rakettillu missilit atorlugit saassussinerit pineqartut oqaatigineqarpoq.

Iranimi sakkutuuisa USA saassussiniinnassappat "suli ilungersunarnerusumik qisuariarnissartik" oqaaseqarnerminni mianersoqqusissutigaat.

IRGC-p nalunaarutaa naapertorlugu, saassussinerit Amerikamiut Bahrainimi sakkutuuisa imarsiortut sakkutooqarfigisaannut, Jordanimi sakkutuut timmisartortartut sakkutooqarfigisaannut aamma Kuwaitimi sakkutuut timmisartortartut sakkutooqarfigisaannut sammipput.

Iranip sakkutuuisa Jordanimi sakkutooqarfissuarmi "saassunniakkat pingaarnerit sisamat“, ilaatigut timmisartunut sorsuutinut F-35-nut atortussaq aamma nakkutilliivik, eqqorsimanerarpaat.

Saassussineq USA-p Iranimut saassussinertik marlunngornermi unnukkut nalunaarutigereeraalu pivoq.

Eqqissisimaniaqquneqartut

USA-p nalunaarutaa naapertorlugu saassussineq, Amerikamiut sakkutuuisa qulimiguuliutaat Kangerliumanersuup nerukinnerata Hormuzip eqqaani ataasinngornermi nakkartinneqarnerata kingorna, imminut illersorniarluni pivoq.

Amerikamiut sakkutooqarfiata, U.S. Central Commandip, Iranimut saassussinerit unitsinneqarnerat pingasunngornermi unnuap qeqqanut nalunaarutigaa.

Bahrainimi silaannakkut pingasunngornerup unnuaani kalerrisaarisoqarpoq. Nunamut namminermut tunngasunut ministereqarfik,  IRGC-p saassussineq nalunaarutigeqqammeraalu, inoqatinut attaveqaammi X-imi allappoq.

- Silaannakkut kalerrisaarut aallartinneqarpoq. Innuttaasullu eqqissisimaniarnissaannik kajumissaarneqarput sumiiffimmullu isumannaatsumukaqquneqarlutik, ministereqarfik allappoq.

Kuwaitimi sakkutuut nunap silaannaatigut illersornissaqarfiata "akeqqanut eqqorniagassanut“ saassussinertik pingasunngornerup unnuaani nalunaarutigaat.

USA-p Israelillu Iran februaarip 28-anni saassuppaat, tamatumalu kingunerisaanik Iran akiniaalluni saassussivoq, ilaatigut Amerikamiut nunap immikkoortuani sakkutooqarfiinut.

USA Iranilu apriilip aallartinnerani sakkuaakkunnaarnissaq pillugu isumaqatigiipput.

Iranip Amerikamiut sakkutooqarfiinut sumiiffimmiittunut saassussisarnera tamatuma kingorna arlaleriarluni nalunaarutigineqarpoq.

/ritzau/