Inuusuttut sineriammeersut Qaqortumi nukittuneqqusaannermi unammilersut

Nukittuneqqusaanneq, assigiinngitsunik tallimanik unamminertaqartussaq, ullumikkut ataatsiniit arfineq marluk qeqqata tungaanut Qaqortup timersortarfiani ingerlanneqassaaq.

Unammineq Qaqortumiit, Maniitsumiit, Narsamiit Aasianniillu peqataaffigineqassaaq.

Aaqqissuisut ilaat Sara Sebulonsen, nammineerluni aamma unammeqataassaaq. Unamminissaq soqutigineqarluarsimasoq KNR-imut oqaatigaa.

-18-iliineqanngitsut sineriamminngaanniit marluk takkupput, aatsaat soraarummeeqqammeraluarlutik piumassuseqarnerat takuneqarsinnaalluni. Nuannaartunaqaat peqataajartormata.

Nukittuneqqusaanneq unammisussanit tamanit peqataaffigineqalinngikkaluartoq, Sara Sebulonsenip peqataasoqarluartussaanera tulluusimaarutigaa.

-Unammisussat nalunaarnikut 15-iuvugut. Marluk unipput angalaneq peqqutigalugu, taamaasilluta 13-iussapput unammisussat tamarmik.

Sungiusarneq pingaartinneqartoq

Nukittuneqqusaattussat ilaat Inuuteq Bidstrup Narsameersoq, ukioq manna siullermeerluni peqataalerpoq. Taanna januaarimili sungiusarluni aallartippoq.

-Imminut unammillernissara taamaallaat pingaartinneruara. Soorunami ajorsariartorluta unammiarneq ajoratta, neriuutigaara angusakka naammaginarumaartut.

Kujataani arnani nukittuneqqusaannermi 2024-mi ajugaanikoq Nivikka Joelsen, peqataasut ilaaniippoq. Taanna kalaallit arnat nukittuneqqusaanneranni siorna aamma ajugaavoq.

Ukioq mannalu unamminissamut qilanaarsimavoq.

-Ippassaanikkunni aatsaat pissangaammillattaarlunga allartippunga, ukiut siuliani taamak pissangatiginikuugunanngilanga.

Kujataani nukittuneqqusaaneq Narsami siorna ingerlanneqarpoq, ukiut tamaasalu ingerlanneqartarnissaa aaqqissuisut pilersaarutigaat.