Inuttut pisinnaatitaaffiit Kinami innarlerneqartarnerat Bidenip isornartorsiorniarai

USA-p Kinamik attaveqaqatigiittarnera ammatinniarlugu, USA-p præsidentiata Joe Bidenip Cambodjami tikeraartilluni oqaatigaa, taamaaliornikkut aaqqiagiinngissuteqarnissaq pinngitsoortinniarlugu.

Bidenilli, nunat aningaasarsiorfiunerpaat 20-t, tassa G20-t Indonesiami Balimi ataatsimeersuarnerannut atatillugu Kinap præsidentianik Xi Jinpingimik aqagu ataasinngornermi ataatsimeeqateqartussap, USA Kinamik unammillerniartoq erseqqissaatiginiarpaa, inuttullu pisinnaatitaaffiit Kinami assigiinngitsutigut innarlerneqarnerat ammasumik isornartorsiorniarlugit.

Biden præsidentitut ivertinneqaramili Kinap præsidentianik siullerpaamik ataatsimeeqateqalerpoq.

USA-p Kinallu akornanni pissutsit ukiut qulikkaat arlallit ingerlaneranni aatsaat taama ajortigineranni ataatsimeeqatigiissapput.

Ukrainemi sorsunneq, silap pissusiata allanngoriartornera, Taiwanilu pillugit pissutsit, naalakkersuinikkut siuttut marluk taakku pingarnertut oqaloqatigiissutiginiaraat ilimagineqarpoq.