Politiit ullormut nalunaarutaat: Inuk pinngitsaaliilluni akiliisitsiniarnerminik unnerluutigineqartoq

Inuk sexstortionini pillugu marlunngornermi unnerluutigineqarpoq, sextortion tassaavoq kinguaassiornermut tunngasut assit videollu atorlugit kimigiiserluni tiinganiartoq, politiit marlunngornermi ullaakkut paasititsipput.

Allattoq Nicole Sander Bertelsen

februaarip 17-at 2026 09:35

Nutserisoq Karla Heilmann

‘Inersimasoq’ politiinut marlunngornermi ullaap tungaa unnerluutigineqarpoq, pineqartup inummut allamut pinngitsaalillugu akiliisitsiniarnini pissutigalugu.

Pinerluttup unnerluutiginnittoq aningaasanik nuussinngippat kinguaassiuutinut tunngasunik siaruarterinissamik sioorasaarpaa.

Taamatut pinngitsaaliilluni akiliisitsiniartarneq inerteqqutaavoq, politiinullu nalunaarutigineqartuaannarsinnaapput, Kalaallit Nunaata Politiivini sillimasut pisortaat Aputsiaq Hansen marlunngornermi ullaakkut erseqqissaavoq.

- Suliaq inuilluunniit pineqartut pillugit oqaaseqarsinnaanngilanga, politiilli suliamik misissuipput, suliassanngortitsisoqareerlunilu.

Unnerluutigineqartuaannarsinnaasoq

Politiit pinerlisumik pasisaqarlutik, oqaaseqarfiginerusinnaanaguli, sillimasut pisortaata ilanngullugu oqaatigaa.

- Inuit kimigiiserluni tiinganiarneq inerteqqutaasoq paasissagaat pingaaruteqarpoq, taamatullu misigisaqartoqarpat politiinut unnerluussisoqartuaannarsinnaavoq, Aputsiaq Hansen oqarpoq.

- Taamatut misigisaqartoqaruni akiliisariaqartutut misigissanngillat, politiinut saaffiginnittoqartuaannarsinnaavoq.

Tamanna misigisimagukku apeqqutissaqaruilluunniit, Kalaallit Nunaata Politiivi 70 14 48-mut attavigisinnaavatit.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.