Innuttaasut USA-mut eqqissisimasumik akerliussutsimik takutitseqataanissamut kajumissaarneqartut

Nuummi innuttaasut USA-p nunatsinnik tiguaanissamik pilersaarutaanut akerliunerminnik takutitsiniarlutik arfininngorpat pisoqatigiissapput.

Innuttaasut ilai akerliussutsimik takutitsinissamut aaqqissuussisut tusagassiuutinut nalunaarummi taama allapput.

Ataatsimoornerput takutikkumallugu illoqarfinni nunaqarfinnilu allani innuttaasut aamma taamaaliornissaat aaqqissuussisunit kajumissaarutigineqartoq, taakku allapput. 

Nuummi akerliussutsimik takutitsinermi pisoqatigiinneq katerittarfik Amisuni aallartissaaq Amerikamiullu sinniisoqarfiata silataani unissalluni. Pisoqatigiinnermi aqqutigisassaq Nuummi USA-p pilersaarutaanut 2025-mi akerliussutsimik takutitsinermi pisoqatigiinnermi, oqaluttuarisaanermut pingaarutilimmi, aqqutigineqartumut assingusorujussuussaaq.

Innuttaasut piffissami sivitsortumi tatineqarlutillu toqqissisimajunnaartinneqartut, tamatumalu uninnissaa maanna piffissanngortoq, aaqqissuusseqataasut ilaat Bikki Jepsen isumaqarpoq. 

Nunatsinni politikerit qinikkallu nunatta tuniniarneqannginnera arlaleriarlutik naqissusersereerpaat – aamma sakkutooqarnikkut pissaanermik atuinikkut pisiarineqarsinnaanngitsoq tiguarneqarsinnaanngitsorlu, aaqqissueqataasoq Bikki Jepsen oqarpoq.

Politikerit tapersersorneqartut

Politikerit inuttaasunit tapersersorneqarnerat innuttaasullu ataatsimoornerat aamma takutikkumallugu akerliussutsimik takutitsisoqassaaq. 

- Iliuuseqartugut, ataatsimoortugut politikerigullu, atorfilittagut suleqatigullu tapersersorigut akerliussutsimik takutitsinitsinni takutikkusupparput, Bikki Jepsen tusagassiuutinut nalunaarummi oqarpoq.

- Nunarput, nunap inui, namminerlu aaliangiisinnaassuserput ataqqineqaqquarput. Nunat tamalaat akornanni inatsisit inuiaallu inatsisaat ataqqineqaqquagut. 

-  Uagut kisitta sorsuutiginngilarput – ilungersuutigalugu sorsuutigisarput nunarsuatsinnut tamarmut attuumassuteqarpoq, Avijâja Rosing-Olsen, akerliussutsimut takutitsinissamut aaqqissuusseqataasoq oqarpoq. 

Erfalasorput tigullugu inuit assiliillutik filmiliorlutillu peqataanissaannik kajumissaarneqarput, akerliussutsimik takutitsinernit, eqqissisimasumik ingerlanneqartunit, oqariartuutaasut siammarterneqarniassammata.

Illoqarfinni allani akerliussutsimik takutitsinerit

Nuummi akerliussutsimik takutitsisoqarnerani Aarhusimi, Aalborgimi Odensemilu aamma akerliussutsimik takutitsisoqassaaq. 

Akerliussutsimik takutitsinissat pilugit paasissutissat Facebookimi takuneqarsinnaapput.