Danskit naalakkersuisui: Innuttaasut tamarmik ulluni pingasuni imminnut uumatinniarsinnaasariaqarput
Sivikinnerpaamik ulluni pingasuni imminut isumagisinnaanissat pissutigalugu nerisassanik, imermik, nakorsaatinik innaallagiamillu angerlarsimaffinniitsitaqarnissat isumagiuk.
Danskit naalakkersuisui Danmarkimi innuttaasut tamarmik inuunermi pisariaqarnerpaanik imminnut pilersorsinnaanissaannut kaammattuuteqarlutik oqarput.
Siunnersuutit ajornartoornermik nalaassisoqaraluarpat imaluunniit sorsunnertut taaneqarsinnaasumik pisoqassagaluarpat oqartussat pisariaqartitsiviunerpaamik suliaqarsinnaaniassammata innuttaasut inoqutigiillu imminnut isumagisinnaanissaannik qulakkeerissutaassapput.
Illersornissamut ministeri Troels Lund Poulsen (V) sapaatit akunnerata naanerani taama nalunaaruteqarpoq, tamannalu Danmarkimi inersimasunut tamanut allagaqaateqarnermik malitseqaateqartinneqassaaq.
Imaanngikkaluarpoq Danmarkimut saassussisoqarnissaanik imaluunniit Danmarkip aqqusernginut allamiut sakkutuuliinissaannik sioorasaartoqarmat.
Kisianni interneti atorlugu saassussisoqassagaluarpat innaallagissamik pilersuineq eqqorneqaratarsinnaanera assersuutitut Troels Lund Poulsenip oqaatigaa.
Kaammattuutit aamma ilagaat orsiissummik powerbankimik ulikkaalugu immersimasumik peqarnissaq - soorlu mobiili orsueruttooraluarpat immiissutaasinnaasoq.
- Imeq inuussutissallu ullunut pingasunut naammattut, nakorsaatit pisariaqartitat ikiueqqaarnermullu atortut, inigisaq kiassarsinnaanngikkaanni oqorsaatissat, innaallagiaarukkaanni imminut isumagisinnaajumalluni pigisariaqarput, Troels Lund Poulsen oqarpoq.
Norge Sverigelu nunami ajornartoornermi innuttaasut upalungaarfissaat pillugit maleruagassaqareerput.
