Qasigiannguani Avannaata Qimussersua aallartilluarpoq: Inerneri tulleriiaarlugit maani takukkit

Sukkaniunnerup inerneri tulleriiaarlugit imaapput:

1. Siullerpaaq (Nr. 1): Angutimmarik Tygesen - Saattut (Uummannap eqqaani)
2. Tullia (Nr. 2):  Anthon Street - Saattut (Uummannap eqqaani)
3. Pingajuat (Nr. 3): Markus Jensen - Saqqaq (Ilulissat eqqaanni)
4. Sisamaat (Nr. 4): Paulus Christensen - Tasiusaq (Upernaviup eqqaani)
5. Tallimaat (Nr. 5): Jonas Kristensen - Ilulissat
   (Nutarterneqassaaq)

 Sukkaniunneq ukiut tamaasa illoqarfinnut assigiinngitsunut inissinneqartarpoq, sukkaniuffissaq aamma isorartussuseq ukiut tamaasa allanngortarpoq.

Avannaata Qimussersuanngortoq

Angutimmarik Thygesenip ajugaanini ima oqaasertalerpaa: — Nuannertorujuuvoq, soorunami. Ukiorsuaq piareersarnikuulluni apinerani angusaq taama kusanartigisoq nuannertorujussuuvoq.

Aqqutaa apullu nutaaq

Avannaata Qimussersuani ullumi ingerlaarfik 36,9 kilometeritut isorartutigisoq atorneqarpoq. Sukkanniuffik aqqutigissaaraluartoq, siku ilaatigut atoruminaattoq ajugaasup oqaatigaa:

- Aqqutigissaarpoq, kisianni atoruminaappoq aput nutaajulluni illineri atuarneqarpallaarnikuunatik atoruminaalaarpoq, Angutimmarik oqarpoq.

Angutimmarik Thygesen 22-nik ukiulik, siullermeerluni 20-nik ukioqarluni 2024-mi peqataavoq, taamanikkut normu 13-inngorluni. Siorna 2025-mi anngutinngitsooraluarpoq, ukioq mannali anngulluni ajugaasutut inissippoq.

Aaqqissuisut silaginnera iluarisimaaraat

Avannaata Qimussersua Qasigiannguani silagissorsuarmi ullumi ingerlanneqarpoq, peqataasullu 26-ullutik. 
Gaba Rosbach, sukkaniunnermik aaqqissueqataasoq, ukioq manna sukkaniunnerup ingerlalluarneranik ima oqaaseqarpoq:

- Qujanartumik apinikuugatta. Aammalu sukkaniuffiup aqqutiginnera unnersiutiginikuuaat, aamma aqqutaa pitsaagami, taavalu aamma peqataasut iluarisimaarpaat, Gaba oqarpoq.