Kalaallit Nunaanni takornariaqarneq innuttaasunut iluaqutaanerussaaq.

Takornarialerinermut inatsisissatut siunnersuutip anguniagaani pingaanerpaatut tamanna inissinneqarpoq, taannalu maanna inatsisartuni suliarineqarpoq. Inatsisissatulli siunnersuummi piumasaqaataasut nutaat ilaat takornarialerinermi suliaqartunit aalassassimaarteqaaq.

Januarip aallaqqaataani 2025-imi kalaaleq imaluunniit kalaallit arlallit takornarialerinermi suliffeqarfiit piginneqatigiiffiusuni piginnittussaassuseq 51 procent pigineqassasoq  Takornarialerinermi Inatsisissatut siunnersuut akuerineqassagaluarpat piumasaqaataavoq.

Malittarisassanulli nutaanut suliffeqarfiit 1. januar 2027 tikillugu nalimmassarnissamut periarfissinneqarput.

Takornarialerinermi sulinermik piginnittussaanermillu nunami najugaqartunut qulakkeerinninniarnerat sulisitsisut pisortaata naalakkersuisut nersualaarpai.

Taamaakkaluartorli nunami najugaqartut 51 procentimik piginnittussaanerannik piumasaqaateqarnerup  suliamik sammissaqarfimmut kigaallassaataassaaq uffa landskarsimut aalajangiisuusumik isertitsiviusarnissaa pilersaarutaagaluartoq. Taama oqarpoq Sulisitsisut pisortaat, Christian Keldsen.

- Isigigaanni takorarialerineq ineriartornermini sumiittoq taava 51 procentimik piginnittussaaneq sakkortunaagaavallaarpoq, oqarpoq, nangillunilu:

- Assersuunneqarsinnaavoq suliaqarfimmik nunani tamalaani ingerlanneqartumik unitsitsineq suliluunniit aallartippianngikkaluartoq.

Takornarialerineq alliartussagaluaruni aningaasalersorneqarnissaminik pisariaqartitsivoq. Aningaasaliissutaasartullu ilarujussui maanna nunanit allaneersuupput. 

Takornarialerineq ingerlaannarsinnaavoq allamiut 49 procent sinnernagu ingerlatsippata, tassa takornarialerinermut inatsisissatut siunnersuummi periarfissaasoq.

Kalaallit Nunaannut, Kalaallit Nunaanniinneq angalanerlu ussassaarutigissallugit miluunikilkkaanik aningaasarruutaasarpoq. Aamma taama naleqarput pisinermut atortorissaarutit angallassisut angalatitseqatigiiffiillu anginerit atortagaat takornariat tikisinniarlugit. Siunissasmi piumasaqaataasussanut atuuttunngortittussaatillugit aningaasaliisussarsiornissaq oqilarneqanngilaq Sulisitsisut pisortaat isumaqarpoq.

- Takornariat qilammiit tunissutitut nakkarnavianngillat. Suliassaq tassaavoq takornariat nunamukartinnissaat, tamannalu pisarpoq agguaaqatigiiffik atorlugu. Tassa agguaaqaigiissinnaaneq tassaavoq aningaasaliiffigisassaq. Angallammik, hotellimilluunniit imaluunniit qaannamik pisineq naammanngilaq, oqarpoq. 

Isornartorsiuisut: Suliffeqafiit avataaneersut Kalaallit Nunaannut aningaasanik ilisimasanillu tunniussisarput

Siusinnerusukkut inatsisissatut siunnersuutigineqartumi Kalaallit Nunaanni takornaiaqarnermik sullissisuni piginnittussaaneq pingasunni marlunnut nunami inoqartunut pigineqartussatut piumasaqaataavoq.

Sulisitsisunit, Grønlandsbankenimit allanillu sammivimmut attuumassuteqartunit naammagittaalliortoqareerneratigut Naalakkersuisut piginneqataanissamut piumasaqaat 51 procentimut apparpaat.

Imaanngilarli hotellit neriniartarfiillu ilanngunneqartut, taakku ilaatinneqanngivipput. Tamanna tunngavilerneqarpoq aamma taakku nunap innutaasuinik sullissisuummata aamma, tamakku inatsisissatut siunnersuummi atuarneqarsinnaapput.

Kisiannili takornarialerinermik kiffartuussisut nunanit allaneersut Kalaallit Nunaannut akileraartarpoq, soorlu aamma kalaallinik sulisussanik aamma atorfinitsitsisartut minnerunngitsumillu iluanaarutitik takornariaqarnermi neqerorutiminnut aningaasaliissutigeqqittaraat Christian Keldsenip tikkuarpaa.

- Takornarialerinermik suliffeqarfiit angisuut ilsimasagut tamarmik, ataatsimooqatigiiffinnik suleqateqarlutillu ineriartortitsisarput nunami najugaqartunillu suleqateqartarlutik.

Takornarialerinermi suliffeqarfinni piginnittussaanermik killilersuinerit pingaarnerutinnagit nunami suliffinnik pilersitsisut tapersersortariaqaraluaraat naalakkersuinikkut suliaqartunut Sulisitsisut kaammattuipput.

Tassaasinnaappullu sulisunik akeqanngitsumik pikkorissartitsisarsinnaanerit, takornarialerinermut akuersissummik pissarsisinnaanerup ajornannginnerulersinneratigut immaqaluunniit suliffeqarfiit akileraarutiminnik millisaaffigineqarsinnaaneratigut.

Aningaasaqarnermut Siunnersuisooqatigiit: Mittarfiit kikkut akilerpaat?

Takornarialerinermi suliffeqarfinni nunap innuttaasuisa 51 procentimik piginnittussaanerannik piumasaqaat Grønlandsbankenimit iluarisimaarneqanngilaq.

Inatsisissamut siunersuummut atatillugu tusarniaanermut akissuteqammini Grønlandsbanken allappoq takornarianik kiffartuussisut nunani tamalaaneersut Kalaallit Nunaanniit tunuartissasut piginnittussaanermummi piumasaqaatit naammassisinnaannginnamikkit.

- Takornarialerinermik inuussutissarsiuutaasumut ineriartornermullu kinguneqarnerlussinnaavoq, taamaaliornikkummi aningaasaliissutit, sulisut piginnaasallu annaaneqassapput, aningaaserivik allappoq.

 Piginnaasat takkukkaangata aamma aningaasaliissutit aamma takkuttarput. Taamak Aningaasaqarnermut Siunnersuisooqatigiit siulittaasuata Torben M.Andersenip septemberimi KNR-imut oqaatigaa:

- Nunanit allanit aningaasaliissutit tassaannaanngillat aningaasat. Suliffeqarfiimmi sukumiisunik ilisimasaqarluakkajuttarput, taakkulu aallartisarniarnermi pisariaqarluinnarsinnaapput.

Kalaallit Nunaata Aningaasaqarnermut Siunnersuisooqatigiivisa 2024-imi ukiup affaanut aappaanut aningaasaqarneq pillugu nalunaarusiaani takornarialerinermi suliffeqarfinni Kalaallit Nunaata innuttaasuisa piginnittussaanerannik piumasaqaammut sakkortuumik ernummusaarutigaa. 

Nuummi, Ilulissani Qaqortumilu mittarfiliornernut tunngavigineqarpoq Kalaallit Nunaannut takornarianik amerlanerusunik tikittoqartalernissaa.

Mittarfiliornernut atatillugu milliartilikkaanik attartornernut takornarialerinermi isertitaasut matussutissatut atortussaapput.

- Suliniutit aningaasaqarnerannut taakku isertitassatut tunngaviusut pingaaruteqartupiliussuupput. Tamanna ineriartorneq unitsinneqarpat malitsigisaanik suliniutinut allanut aningaasatigut sunniuteqarnerluttussaavoq Aningaasaqarnermut Siunnersuisooqatigiit allapput.

Takornariaqarnerrmut inatsissatut nutaatut siunnersuut nunami najugaqartunut piginnittussaanermik piumasaqaatitaqartoq oktoberip pingajuani Inatsisartuni siullermeerneqarnermini Siumumit, Inuit Ataqatigiinnit, Demokratinit Atassummillu tapersersorneqarpoq.

Pilersaarutit malillugit inatsisissatut siunnersuut novemberip 15-iani aappassaaneerneqassaaq.