Inatsisartut anigaasaqarnermut ataatsimiititaliaat: Coronap ajornartoortitsinerani pilersaarusiorluartoqartariaqarpoq

Coronap ajornartorsiortitsinerata nalaani nunatta aningaasaqarneranut siunissaq ungasinnerusoq isigalugu pilersaarusiortoqartariaqarpoq.

Inatsisartuni Aningaasaqarnermut Akileraartarmullut ataatsimiititaliaq taama tusagassiuutinut nalunaarummi allapput.

Naalakkersuisut ikiorsiissutinik arlalinnik atuutilersitsipput - kingullerlu takornariaqarnerup iluaniippoq.

AAMMA ATUARUK Inuussutissarsiornermut ikiorsiissutit nutaat takornarialerisunut tapersiissasoq

Coronap ajornartorsiortitsilerneraniit inuussutissarsiutilinnut arlalitsigut ikiorsiissutinik pilersitsisoqaraluartoq, coronap ajornartoortitsinera qaangerneqassappat naalakkersuisut siunissaq ungasinnerusoq isigineqartariaqartoq, ataatsimiititaliaq isumaqarpoq.

Ataatsimiititaliap nunat tamalaat aningaaserivissuata innersuussutaat, tassalu aningaasaqarnikkut ajornartorsiornerit ukiuni 150-ini kingullerni ajornersariligassaattut sillimaffigeqquneqartoq.

Ataatsimiititaliamiit qulequttat arlallit ersersinniarneqarput, taakkulu isumaqarput siunissaq ungasinnerusoq eqqarsaatigalugu pilersaarusiorneqartariaqartut.

• Suliffeqarfiit suliaqarfiillu piusinnaassuseqartut coronap ajornartoortitsineranik qaangiinissamut sapinngisamik pitsaanerpaamik atugassaqartinneqarlutik periarfissin­neqarnissaat qulakkeerneqassasoq. Illuatungaatigut tamanna isumaqarpoq suliffeqar­finnik imminut akilersinnaanngitsunik napatitsiniarnermut aaqqissuussinerit peqataa­qataannginnissaat qulakkeerneqartariaqartoq.
• Coronap ajornartoortitsinerata kingunerisai najukkanut taamaallaat pinnatik aamma nunarsuarmioqatigiinnut sunniuteqarmata, tamatumalu kingunerisaanik suliffeqarfiit avammut nioqquteqartut ingerlatsinerat nunani tamalaani niuerfinni atugassiissutaa­sunit sunnerneqarpoq. Coronap nunarsuarmut tamarmut ajornartoortitsinera nunat­sinnit avammut nioqqutigineqartunik avammut tunisinermi akinut piserusussutsimullu qanoq sunniuteqassanersoq apeqqutaavoq.
• Tamatuma peqatigisaanik coronap ajornartoortitsinerata najukkani mikinerni imaluunniit sumiiffinni allani inuiaqatigiinnut sunniutai, illoqarfinni annikiginarsin­naagaluartut, sakkortoorujussuarmik kinguneqarsinnaasut immikkut eqqumaffigine­qartariaqarput. Taamaammat ajornartorsiornerup nalaani ataatsimut isiginnilluni iluarsiissuteqarnissaq ataatsimiititaliamit kaammattuutigineqarpoq. Assersuutigalugu eqqumiitsuliortut takornarianut eqqumiitsulianik tunisaqartartut takornariaqarnermut ikiorsiissutinut ilanngutsinneqarnerat pissusissamisuussaaq.