Inatsisartuni politikerit Kongressimi ilaasortat ataatsimeeqatigereerlugit isumalluartut
Kalaallit, Amerikamiut danskillu politikerii Københavnimi Folketingimi tallimanngormat ataatsimiinnissaannut naapeqatigiinnerini, nunarsuaq tamakkerlugu tusagassiortunit nakkutigineqangaatsiarput.
Nunarsuarmi qulequtarineqarnerpaaq: Præsidentip Trumpip Kalaallit Nunaannik tiguaanissamik kissaataa pillugu, USA-mi kongressimeersut politikerit aqqanillit, Inatsisartuni Nunanut Allanut tunngasunut Sillimaniarnermullu Ataatsimiititaliami ilaasortat aamma Folketingimi Nunanut allanut tunngatillugu Aalajangiisartuneersut politikerit, tallimanngormat oqallinneranni assiliissutit linsitai tungaannut sammipput.
Pipaluk Lyngemut (IA) Nunanut Allanut tunngasunut Sillimaniarnermullu Ataatsimiititaliami siulittaasumut, angusaqarluarusussuseq erseqqippoq.
Amerikamiut politikerit peqatigalugit oqaloqatigiinnermik aallartitsineruvoq.
- Oqaloqateqarnissaq attaveqatigiinnerlu tungitsinniit kissaatigiuarparput. Oqaloqatigiinnerillu aallartinneqarsinnaanerinut periarfissat tamakkerlugit ammasutut isigaavut, taanna oqarpoq.
Amerikamiut politikeriisa eqqasuutivut paasisinnaagaat
Folketingimi ilaasortaq Aaja Chemnitz (IA) Kalaallit Nunaannut Ataatsimiititaliami siulittaasoq, ataatsimiinnerup kingorna oqaaseqaqqaartuuvoq. Tassani Kalaallit Nunaata Danmarkillu ataqatigiilluinnarnerat naqissuserpaa.
- Kalaallit Nunaanni eqqasuutivut paasisinnaavaat. Taamaalillunga USA-miit, Kalaallit Nunaanniit Danmarkimiillu suleqatikka qujaffigaakka.
- Ullut artornartorsiorfiupput, taamaattumik suleqatigiinneq ataqqeqatigiinnerlu pingaaruteqarput, Aaja Chemnitz ataatsimiinnissamut suliniuteqartuusoq oqarpoq.
Pipaluk Lynge aamma oqaaseqarpoq. Oqalugiarnini inuiannut kalaallinut kalaallisut aallarnerpaa.
Kalaallit Nunaata kissaatai erseqqissumik saqqummiunneqarnissaa pineqartoq taassuma erseqqissaatigaa.
- Kalaallit qanoq kissaateqarnerat erseqqissumik oqaatiginnissaa pingaaruteqarpoq, taanna oqarpoq.
Kalaallit Nunaata Natomi inissisimanera erseqqissaatigaattaaq.
- Kalaallit Nunaat Natomi ilaasortaavoq, taamaattumik suleqatigiinnerput suleqatigiinnissamillu kissaateqarnerput maani aamma oqaatigaarput, Pipaluk Lynge oqarpoq.
Pissaanileqqusaannerujussuarmi sallunaveeqqutitut tigusatut ippugut
Siumumeersoq Erik Jensen ataatsimiinnermiit nuannaarluni aamma anillappoq. Taanna siornatigornit isumalluarneruvoq.
- Ataatsimiinneq pitsaalluinnarpoq. Ataqatigiippugut pisinnaatitaaffivullu pigisavut pillugit illersuerusuppugut, taanna oqarpoq.
Erik Jensenip oqarnera naapertorlugu, kalaallit politikeriinit, Amerikamiunut Kongressimi ilaasortanut, Kalaallit Nunaanni eqqissisimalluni misiginissaq pingaaruteqartoq, immikkut oqariartuutigineqarpoq.
- Annilaangavugummi. Pissaanileqqusaannerujussuarmi uani sallunaveeqqutitut tigusatut ippugut, taanna nangilluni oqarpoq:
- Amerikamiunut ilaasortanut oqariartuutivut tamakkerlugit apuuppavut, taakkulu taperserneqarput. Taamaattumik tamanna toqqissisimanartorujussuuvoq.
Tiguaaniartoqarnissaanut annilaanganngitsoq
Assinganik Nivi Rosing (IA) nalunaaruteqarpoq.
Tamarmik ataqqinnippaluttumik nipeqarput, tamannalu pitsaasumik oqaloqatigiinnissamut toqqissisimatitsivoq, taanna oqarpoq.
Nivi Rosing Inatsisartuni ilaasortaasuni inuusunnersatut, Kalaallit Nunaanni pingaartumik inuusuttut, Trumpip oqaasii pillugit qanoq sunnertissimatiginerat misigaajuk?
- Inuusuttunuku politikikkut ullumi aalajangiussagut atugassarigaat. Taamaattumik oqaloqatigiinnerit kalaallit sorusunnerat, namminiilivinneruppat imaluunniit nunat sorliit suleqatigineqassanersut tunngavigineqarnissaat pingaarutilerujorujussuusoq, Nivi Rosing oqarpoq.
Naak Trumpip Kalaallit Nunaat USA-mut ilaalernissaa kimigiiserfigagaluaraa, tiguaasoqaratarsinnaanera taassuma annilaanngatiginngilaa.
- Kalaallit Nunaat USA-lu Nato aqqutigalugu iligiinnerat pissutigalugu, taannaavorlu tunngavissarisassarput, Nivi Rosing oqarpoq.
