Imminut toqunneq misissorneqalerpoq
Arnaq inuusuttoq pinerluuteqarsimasunut inissiisarfimmut inissinneqarpoq, angutip saassunneqarneratigut toqumik kinguneqartumut pasilliuteqartoqarneratigut. Angut saassunneqarpoq februaarillu ulluisa aappaanni toqukkut qimagulluni.
Arnap inuusuttup taassuma arnaa pisoq pillugu eqqartuussissuserisuni aqqutigalugu radiaoviisimut saaffiginnippoq.
Pisup alianartup ingerlarnga qulaajarniarlugu Qaasuitsup Kommunia aamma pinerluttunik isumaginnittoqarfik sulipput.
Arnaq inuusuttoq taanna nunatsinni pinerlutttunik isumaginnittoqarfimmit akisussaaffigineqarluni imminut toquppoq.
Arnap inuusuttup toqunerata kingorna pinerluuteqarsimasunut inissiissarfimmi suleriaatsip nalilersorneqarnissaa pinerluuteqarsimasunut isumaginnittoqarfiup suliariniarpaa. Sulinermi malittassat malinneqarsimasut, nunatsinni pinerluttunik isumaginnittoqarfimmi pisortap Michael Stagep oqaatigaa:
- Pinerluuteqarsimasunut inissiisarfiit tamarmik immikkut suleriaaseqarput. Inissinneqarsimasut nakkutigisariaqaraangata - inissiisarfimmi nakkutigineqartarfiusumut inissinneqartarlutik. Imminut toqunnissaminnut ilimanaateqartut sivisunerusumik nakkutigineqartarlutik. Arnaq inuusuttoq 17-inik ukiulik imminut toqunnissaminut ilimanaateqarsimanngilaq aamma tamanna pillugu pasinarsimanani, Michael Stage oqarpoq.
Arnaq inuusuttoq Aasianni pinerluuteqarsimasunut inissiisarfimmut inissinneqarmat imminut toqunnissamut ilimanaateqarnersoq nalunaarutigineqarsimanngitsoq, Pinerluttunut isumaginnittoqarfimmi pisortap Michael Stagep oqaatigaa.
Imminut toqunnerup pinngitsoortinneqarsimasinnaanera akissutissarsiuminaappoq, tassami
Isumaginnittoqarfimmi pisortaq Magga Fencker pisoq pillugu annertunerusumik oqaaseqarsinnaannginnerarpoq, arnalli inuusuttup ikiorneqarnissaanut pillugu suliniummik aallartitsisoqarsimanerarlugu.
- Nunatsinni meeqqat inuusuttullu angerlarsimaffiup avataanut inissittussat ulloq unnuarlu paaqqinnittarfinnut inissiiviit naammattut pigissallugit Namminersorlutik Oqartussat akisussaaffigaat, aammalu taamatut immikkut paarisariaqartunut inissiivissat immikkut illersugaasut pigissallugit aamma akisussaaffigivaat. Kommuni soorunami tassaavoq akiliisussaq taamatut inissiivinnut inissiivinnut inissiisoqassatillugu, Qaasuitsup Kommuniani Isumaginninnermut Pinaveersaartitsinermullu Ingerlatsiviani pisortaq Magga Fencker oqarpoq.
Inuit Pinerluttunik isumaginnittoqarfimmit tigummineqartut tallimat ukiut kingulliit arfinillit ingerlaneranni imminut toqussimasut, kisitsisit Pinerluttunik Isumaginnittoqarfimmeersut takutippaat.
