- Eqqarsalersitsinngitsuunngilaq: Immikkut ilisimasallip Amerikamiup milliardærip Nuummi ataatsimeeqatigineqarnera mianersoqqussutigaa

Kalaallit ataatsimiinnermi peqataasut Avaaraq S. Olsenip (IA) Donald Trumpip ikinngutaanik milliardærimik, Ronald S. Lauderimik siorna novembarimi ataatsimeeqatiginninnera kaffisoqatigiilluni kaagisoqatigiinneq inussiarnisaarnermik pulaarnertut taavaat.

Politikki inuussutissarsiutinulluunniit aningaasaliisoqarnissaa oqaluuserineqanngilaq.

Nunatsinni kommunit annerpaartaanni borgmesterip angut USA-p præsidentiata nunatsinnik piginninnialernissaanik isumassarsititsisumik ataatsimeeqateqarnera kalaallit meerartaannut inuusuttortaannullu kiisalu kulturimut tunngasunik aningaasanik tunissuteqarnissamut taamaallaat tunngassuteqarpoq.

Ronald S. Lauderilli politikkikkut inuussutissarsiornermillu tunuliaqutaqarnera taassumalu ajunngitsuliornermik suliaqarnera immikkoortinneqarsinnaappat?

USA-p ajunngitsuliornermik suliaqarnermut immikkut ilisimasaqarnerpaartaata ilaata David Callahanip taamaattoqarsinnaanngissoraa.

- Amerikamiu milliardæri Kalaallit Nunaanni aningaasaliinissamik soqutiginnittoq, Amerikamiut tiguaanissaanik siuarsaasoq aamma præsidentimut Kalaallit Nunaannut sioorasaarisoq Kalaallit Nunaanni ajunngitsuliorniarluni tikittoq, David Callahan oqarpoq, nangillunilu:

- Tamanna eqqarsalersitsinngitsuunngilaq.

- Iliuusai eqqarsalersitsinngitsuunngillat, tassami inuk taanna tusaamaneqarumalluni iliuuseqarpoq, ajunngitsuliorumatuujuninilu taamaaliornermut atorpaa.

David Callanan Inside Philanthropy-mik, USA-mi aningaasaateqarfiit aningaasanik tunissuteqartartut pisuut pillugit nutaarsiassaqartitsivimmik pilersitsillunilu aaqqissuisuuvoq.

Ajunngitsuliortarneq pillugu ukiorpassuarni allaaserisaqartarpoq atuakkamillu The Givers: Wealth, Power, and Philanthropy in a New Gilded Age-mik (Tunisisut: Pisuussutit, pissaaneq aamma ajunngitsuliorneq piffissami nutaami ukiut akimmaruttorfiini, aaqq.) atuakkiortuuvoq.

Taanna Nuummi ataatsimiinneq politikkimut milliardærillu soqutigisaanut tunngassuteqartutut isiginngitsuusaassallugu ajornartoq oqarpoq, USA-mimi pissutsit pissanganarseruttorfianni ataatsimiinneq pimmat.

Isertortumik siunertaqartoqarsinnaasoq

- Amerikamiut milliardærii aalajangersimasumik anguniagaqarunik amerlanertigut assigiinngitsunik periaaseqartarput, David Callahan oqarpoq.

Politikkikkut tunissutitigut aamma ingerlatseqatigiiffinnut kattuffinnullu aningaasaliissutitigut namminneq soqutigisaminnut siuarsaatitut atortarpaat.

Aammali ajunngitsuliornikkut tunissuteqarnikkut.

Tamatumunnga arlallit pissutaasinnaasut, David Callahan oqarpoq.

- Immaqa tusaamaneqarnerulerniarlutik aningaasatigulluunniit tapersersortakkaminnit iluarisaalerniarlutik taamaaliortarput, taanna oqarpoq.

Pisuulli ajunngitsuliortut Lauderitut ittut suna pissutigineraat oqaatigiuminaattarpoq.

Ronald Lauder ajunngitsuliornissamik neqeroorutitigut, immaqa niuernikkut soqutigisaminik siuarsaaniarluni Kalaallit Nunaanni tusaamaneqarnerulerniarsarisinnaasoq, David Callahan oqarpoq.

Imaluunniit Lauderip nuna ikiorusungaarsinnaavaa isumaqarluni aningaasaatini inunnut iluaqutaasinnaasut, David Callahan oqarpoq.

Taakkualuunniit tamarmik pissutaasinnaasut, taanna oqarpoq.

Ajunngitsuliornerup niuernerullu ataqatigiinnerat

Pisuut aningaasaatiminnik aningaasaliiffigisimasaminnut amerlanertigut sunniuteqartartut, David Callahan oqarpoq.

Tamatumunnga atatillugu Ronald Lauderip Kalaallit Nunaanni ingerlatseqatigiiffinnut aningaasaliisarsimanera ukiorpassuarnilu niuertut politikerillu oqaloqatigiartorsimallugit allaaserisaqartarsimanera eqqaamassavarput.

Taamaattumik taamaaliornikkut ajunngitsuliornermik suliaqarneq aningaasaliinerlu ilaannikkut ataqatigiittarput.

Kisianni tusaamasaanerulersitsiniaannarnertut isigineqassanngilaq, ajunngitsuliorusunneq aningaasarsiorniarnermuinnaq politikkikkulluunniit soqutigisaqarnikkut pissuteqaannarsinnaanngimmat.

Pisuujusut ilaasa aningaasaliiffigisaminni innuttaasut ilumoorlutik soqutigisarpaat, taanna nassuiaavoq.

- Ilaatigut tusaamasaanermik anguniagaqarnertut isikkoqarsinnaavoq, aammali ilumoorluni iliuusaasinnaalluni - imaluunniit taakkua marluutillugit.

Kalaallit Nunaanni juutit ikiorniarlugit anguniagaqarneq?

Taamaakkaluartoq Ronald Lauderip Kalaallit Nunaannut soqutiginnileriasaarnera pasinarsinnaavoq.

Ronald Lauderip Kalaallit Nunaanni ilinniartitaanikkut kulturikkullu suliatigut ajunngitsuliorniarnera ajunngitsuliortarnermigut pingaarnertut sammisarinngilai.

Aningaasaateqarfia, Ronald S. Lauder Foundation, eqqumiitsuliornermik suliniutinut juutillu ilinniarfiinut kattuffinnullu tunissutinik tunissuteqartarpoq.

The Times of Israelip allaaserinninnera naapertorlugu Kalaallit Nunaanni juuteq ataasiinnaavoq, taannalu Amerikamiuuvoq Narsami najugalik.

Kalaallit Nunaanni juutinut oqaluffeqanngilaq, aamma juutit aaqqissuussaasumik peqatigiiffeqanngillat, Amerikamiut sakkutooqarfianni Pituffik eqqaassanngikkaanni.

Trumpitut politikkikkut isiginnittaaseqartoq

Ronald Lauder konservativit anguniagaannut politikkikkullu qinigassanngortitaannut dollarinik millionilikkuutaanik sivisuumik aningaasaliisarpoq.

Amerikami politikkerit tukkornerpaartaasa ilagaat.

Ronald Lauder aamma suliniutinut Donald Trumpip nunanut allanut politikkianut attuumassuteqartunut aningaasaliisarpoq, ilaatigut Ukrainemi pisuussutinik piiaanermut.

David Callahanip politikkikkut isumaliutersuutitigullu misissueqqissaarnermini Kalaallit Nunaannut oqariartuutaa erseqqippoq:

– Aningaasat itigartissigit soorpassinnerisullu taallugit: Kalaallit Nunaanni innuttaasunut ajunngitsumik isiginnilersitsiniarneq USA-llu tusaamaneqarneranik pitsanngorsaaniarsarineq, tamatumalu peqatigisaanik Kalaallit Nunaannut tatisineq takuneqarsinnaanngitsoq akuerineqarsinnaanngitsorlu.

- Erseqqissumik naaggaaritsi. Ronald Lauder Kalaallit Nunaannut iserniarsarinera unitsissiuk. Kalaallit Nunaannut ikinngutaanngilaq, ajunngitsuliorneq pillugu immikkut ilisimasalik oqarpoq.