Ulloq unnuarlu angerlarsimaffik ingerlalluartoq meeqqanillu peroriartorfiulluartoq qanoq  anguneqassava? 

Apeqqut KNR-imit Bonnie Jensenimut apeqqutigaarput. Taanna Ilisimatusarfimmi lektoriuvoq inunnillu isumaginninnermi immikkoortortaqarfimmi aqutsisuulluni. 

Taamaaliorpugullu allaaserisat takornarialerinermik siornatigut suliallinnut Nuuk Outdoorimut tunngasut piffissami kingullermi aammaarluta oqaluttuarereeratsigit. Suliffeqarfik Isunngamik ateqaleqqammerpoq, meeqqanillu inissinneqarsimasunik piffissami sivitsortumi akisussaaffeqarluni.

Bonnie Jensenip Isunngamut tunngasut oqaaseqarfigerusunngilai, meeqqalli inuusuttullu sumiginnakkat angerlarsimaffiup avataanut inissinneqaraangamik sunik pisariaqartitsisarnersut ataatsimut nassuiaatigalugu.  

Bonnie Jensen meeqqanik inissiisarneq pillugu ukiorpassuarni suliaqarpoq, tamannalu pillugu nunatsinni ilisimasaqarnerpaanut ilaavoq. Ulloq unnuarlu angerlarsimaffik ingerlalluassappat sulisut ilinniarsimasuunissat aalajangiisuusutut siullertut taassuma taavaa:  

- Ulloq unnuarlu angerlarsimaffik ingerlalluartoq piukkunnartorlu qanoq ittuunersoq pillugu aperigumma, taava sulisut ilinniarluarsimasut misilittagaqarluartullu pingaarnerpaatut taarusuppakka. Meeqqanik sullissisut ukiorpassuarni misilittagaqarnissaat aalaakkaasuunissaallu pingaaruteqarpoq.  

- Perorsaanermi tunngavik aalaakkaasuussaaq, taanna oqarpoq. 

Perorsaasut ilinniarsiamasut pingaaruteqartut

Perorsaanermik suliaqarnermi isumaginninneq inuillu akornanni susassareqatigiinnermik suliaqarneq pineqartarpoq. 

- Meeraq isumaginnittumut atassuteqarluassappat, taassuma aalaakkaasuunissaa meeqqallu soqutigisaa aallaavigalugu sulinissaa pingaaruteqarpoq, Bonnie Jensen nassuiaavoq. 

- Sulisut "isumassuisuunissaat qanilaartuunissaallu" pingaarnerpaajusoq, ulloq unnuarlu angerlarsimaffimmi pissutsit pillugit, meeqqanut inuusuttunullu naalakkersusiup Aqqaluaq B. Egedep ukioq manna januaarimi akissutaani atuarneqarsinnaagaluarpoq. 

​Aqqaluaq B. Egedep akissutaanut tunngaqqisaartumik Bonnie Jensen isumminngilaq, isumassuinerulli qanilaartuunerullu pingaaruteqassusaat naqissuserpaa. Taakkuli kisimik naammanngitsut nassuiaatigaa: 

- Pissutsit piviusut aalajangiisuusut tassaapput sulisut ilinniarsimasut aalaakkaasullu. Inissiisarneq pillugu oqallinnermi perorsaanermi pitsaassuseq eqqartorneqartuartarsimasoq, taanna oqarpoq. Perorsaanerli meeqqanik paarsinerinnaanngitsoq taassuma naqissuserpaa. 

- Angerlarsimaffik meqqat annaasimasaat perorsaasunit matussuserneqartussaavoq. Suliassaq taanna pingaarutilipilorujussuuvoq, isumaqarpungalu tamanna ilungersuunnerusariaqaripput qujaniarfiginerullugulu. 

Piumasarsorfiussanngilaq

Sulisut saniatigut ulloq unnuarlu angerlarsimaffiup initaani periarfissat aamma assigiinngittaqaat. 

Sulisut aalaakkaappata suliaminnullu tunngasumik ilinniarsimappata, angerlarsimaffiup inigisatut qanoq issusaa pingaaruteqarpallaarneq ajortoq Bonnie Jensen nassuiaavoq. Tamannali meeqqat inuusuttullu sumi qanorlu inissinneqarsimanerata soqutaannginneranik isumaqanngitsoq oqaatigaa. 

Meeqqat perorluarnissaanut taakku tamarmik immikkut aalajangiisuusut naqissuserpaa: 

- Sulisut amiganngippata, ilinniarluarsimappata, tunniusimappata ilaalu ilanngullugit, taava angerlarsimaffiup initut torrannerpaajunnginnera akorngutaanavianngilaq. Taamali oqareerlunga eqqiluisaarnerup sillimaniarnerullu ajunngitsuunissaat aamma oqaatigissavara. 

Inillu meeqqamut angerlarsimaffittut, meeqqat pillugit isumaqatigiissummik malinninnissaa ilutigitillugulu tikkuarpaa, inuiaqatigiillu akuuffigisat tarrarsorfiunissaa aamma pingaartuunerarlugu. Assersuutigalugu sapinngisamik meeqqat tamarmik immikkut ineeraqarnissaat pingaaruteqartoq. 

Taakkumi tamarmik malinneqanngippata?

- Taava meeqqat nallinnassaqaat, Bonnie Jensen naqissusiivoq. 

- Takorlooruk ajortorujussuarmi najugaqarlutit, nuannarinngilluinnakkanni. Inuit ilagerusunngisatit ilinnullu ajunnginnerpaamik tamatigut kissaateqanngitsutut misigisaqarfigisatit najugaqatigalugit, oqarpoq nangillunilu: 

- Tamanna immini ajorluinnarpoq. Inersimasumut ajussaqaaq, meeqqamullu ajunnginnerunngilaq. 

Taamaammallu angerlarsimaffiit meeqqanik inuusuttunillu inissiiviusut akuersinermik suliaqarnermik ingerlatsivimmi sapinngisamik suliarineqarsimanissat pingaaruteqartoq, taanna isumaqarpoq. 

- Inissiisarfiit akuerineqarsimanissaasa pingaaruteqarnera oqaatigerusuppara. Meeqqat pisariaqartitaminnik ikiorneqarnissaat isumagineqarnissaallu inuiaqatigiittut qulakkiissallugu pisussaaffigaarput. 

- Piumasarsorfiunnginnisaa pingaaruteqarpoq, uummatigissut inissaqartitsisullu meeqqamik isertitsiinnarsinnaanngillat, taanna oqarpoq.