Ilulissani Targamik ajutoortoqareersoq: Ilaasut annikitsuinnarmik ajoqusertut

Ilulissat Qeqertarsuullu akornanni Disko Linemik angalaneq nalinginnaasoq Oluf Olrikimut nulianullu, kiisalu allanut tallimanut angalaneq eqqissisimanartuugaluartoq allatorluinnaq inerneqarpoq.

Ilulissanit aallareernermi minutsit qulit qaangiuttut Targa kangerlummi iluliamut aportoq, Oluf Olrik oqaluttuarpoq.

- Pisoq tassanngaannarpoq uivernarlunilu, iluliamullu aporatta arnaq utoqqaq uangalu uppippugut, pisoq pillugu taanna oqaluttuarpoq.

Arnarli utoqqaq namminerlu aamma annikitsumik ajoqusilaaginnarsimallutik nangilluni erngertumik oqarpoq.

Motoori unittoq

Arfineq-marluk ilaasuusimasut aquttorlu ajoqusernerpaasimasoq, Oluf Olrik oqaluttuarpoq.

- Iluliamut apoqqammerluta motoori unippoq, uagullu ilaasugut paasilerparput umiatsiamik aquttoq niaqqumigut ajoqusersimasoq, taanna oqaluttuarpoq.

Arriinnerusumik angalasimasuugunik ajutoorneq pinngitsoortinneqarsimasinnaagaluartoq, ajutoornerup kingorna Oluf Olrik misigivoq.

- Iluliamernit akornisigoornitsinni sukkavallaartumik ingerlalluta ilaasuusugut arlaliulluta isumaqarpugut, taanna oqaluttuarpoq.

Ajutoortoqarnerani sukkavallaarneq pissutaanersoq ilisimaneqanngilaq, qanorli pisoqarsimanera suliffeqarfimmi misissuiffigineqartoq, Imarsiornermillu Aqutsisoqarfik ilisimatinneqarsimasoq, Disko Line ajutoornerup kinguninngua nalunaarpoq.

Nunamukaanneqarneq

Ajutoornerup nalunaaquttap akunnerata ataatsip kingorna Targa Disko Linep angallataanit allamit aaneqarpoq ilaasullu nunamukaanneqarput tassanilu ajoqusersimasut pingasut nakorsamit misissorneqarlutik. Tamarmillu Kommune Qerqertalimmit ikiuigasuarnermik neqeroorfigineqarsimapput.

Ullaap tungaani kingusinnerusukkut ilaasut Qeqertarsuarmut, Oluf Olrikip nuliatalu ulluinnarni najugaqarfigisaannut, angallanneqarsinnaaneq neqeroorutaavoq.

Ajutoortoqarsimasoq, misissuisoqarneranili oqaaseqaqqikkallartoqarnianngitsoq, Disko Linep tusagassiuutinut nalunaarummi uppernarsarpaa.