Illuatunguliuttut ataatsimoortut: Qinersisoqarli
- Naalakkersuisoqatigiit tunuliaqutaqanngillat. Pisariaqarluinnalerpoq eqqortumik akisussaassuseqartumillu nunatta aqunneqarnissaa. Inatsisartut immikkut ataatsimiigiaqquneqarnissaat qinnutigisariaqarparput, Inuit Ataqatigiit siulittaasuat Sara olsvig, Partii Naleqqap siulittaasua Hans Enoksen, Demokraatit siulittaasuat Andreas Uldum aamma Partii Inuit siulittaasuat Nikku Olsen, tusagassiuutinut ataatsimoorlutik ilaatigut allapput.
Nunarput inuiaqatigiillu kalaallit Naalakkersuisunut ilaasortanit ataasiakkaanit aqunneqarsinnaanngitsut oqaatigaat, Naalakkersuisullu aappaagumut aningaasanut inatsisissatut siunnersuutaat assersuutigalugu.
Aningaasanut inatsisissaq
Naalakkersuisut aappaagumut inatsisissatut siunnersuutaat Siumup Inatsisartuni ilaasortaatitaani marluk siunnersuummut akerliullutik taasiniartut partiit Naalakkersuisunut illuatungiliuttut maluginiarsimavaat:
- Naalakkersuinikkut massakkut pisut Nunatta inissisimaneranut assorujussuaq ilungersunarput. Tusagassiorfitsigullu tusarparput takullugillu Inatsisartunut ilaasortat Siumumeersut marluk 2015-imut aningaasanut inatsisissamut akerliullutik taasiniartut, partiit illuatungiliuttut siulittaasui ilaatigut allapput, imalu nangillutik:
- Tupinnarneruvorlu Aalisarnermut Naalakkersuisoq aalisakkanut akitsuusersuinissamut Aningaasaqarnermut Naalakkersuisup saqqummiussaanuy akerliulluni oqarmat ilanngullugulu aalisartut aallerfigineqarnissaannik aningaasanut inatsit siunertaqanngitsoq aamma taamatut aalajangiisoqarnikuunngitsoq, suleqatigiissitarlu aalisarnermut tunngasunik sulialik aallartinneqarsimasoq ilisimanagu oqarluni, illuatungiliuttut siuttui oqarput.
