Christianiami qalipagaq nutaaq pillugu eqqumiitsuliortoq: Illoqarfiup kiffaanngissusillip Kalaallit Nunaannik asanninneranik assersuutaavoq

- Illup isuata pinnersarnera ataqqinaatitut annertuutut tiguara.

Sacha Malinský eqqumiitsuliortutut Cheeky-mik taaguuteqartoq eqqumiitsuliaq sapaatip akunnerini pingasuni kingullerni Københavnimi Christianiap qeqqani illumi Stjerneskibimi ingerlassimasani pillugu oqarpoq.

- Suliap massakkut ingerlatama Christianiap Kalaallit Nunaannik illoqarfiullu kiffaanngissusillip 1970-ikkunniilli kalaallinik ilaatitaqarfigisimasaminik asanninneranik assersuutaavoq, oqarpoq.

Illu portusooq marlunnik quleriilik illoqarfiup kiffaanngissusillip atanerani ukiuni 50-ingajanni kalaallit aalajangersimasumik najugallit Kalaallit Nunaanniilu tikeraartut najortarsimavaat. Massakkullu aatsaat kusassarneqarpoq Stjerneskibip Christianiallu annertunerusumik kusassarneranut atatillugu.

Ilaatigut unaat, ulut arnarlu kalaallisoortoq, nuilarmiuisa sapangartaat aalisariummut nakkaasut qilammi ullorialersuillutik takutinneqarput.

Sacha Malinský-p piaarilluinnarluni kalaallit qangaaniilli ilisarnaataat toqqarsimavai. Taakkumi suli Kalaallit Nunaanni ulluinnarsiutaapput.

Kalaallisuup nuilarmiui Stjerneskibip isuani qalipanneqarput. Assi © : Cheeky/Sacha Malinský

- Sulimi ulu pigineqarpoq, naak qangatut atorneqanngikkaluarluni. Kisianni igaffimmi pigineqarput. Tassaapput suli Kalaallit Nunaanni pingaaruteqartut, inuiaqatigiini nutaarluinnarniikkaluarluni, Sacha Malinský oqarpoq.

Qalipagarlu ilisarnartunik kalaalerpalaartunik imaqartoq aamma Christianiakkoortunit assersuutigalugu kalaaleq inuusuttumit nutaaliaasumit maluginiarneqarnerussaaq.

- Tusarnaaruteqartumit imaluunniit smartphoneqartumit nutaaliaasumilluunniit allamik atuisumit allaanerusumik takutitsiguit alapernaannerulersitssaaq, Sacha Malinský oqarpoq.

Tamannalu pisariaqartinneqarpoq. Tassami Danmark pillugu Kalaallit Nunaanni  ilisimasat annertoqisut akerlianik Danmarkimi killormut ippoq. Tamannalu nunat akornanni oqimaaqatigiikkunnaarsitsivoq, immaqalu qalipakkap tamanna immannguaannarlluunniit allanngortissinnaavaa, neriuppoq.

-  Nunavut pitsaasukkut pitsaanngitsukkullu imminnut atapput. Takusinnaavara ikit ajorunnaarsinneruneqarsinaaasut Danmarkimi kalaallit kulturiat akuerigaanni. Tamanna pingaaruteqaqisoq isumaqarpunga, Sacha Malinský oqarpoq.

Christiania aamma Kalaallit Nunaat assigiissuteqarput

Sacha Malinský aninilu Christianiami peroriartorput, ataataami 1974-imi tassunga nuummat – isertertut siulliit kingornatigut ukiut pingasut qaangiummata.

- Tassami Christianiami tassani najugaqaqqaarpoq, Stjerneskibimi. Taamaattumik uannut immikkut misigissuseqarfiuvoq pinnersassallugu, Sacha Malinský oqarpoq.

Stjerneskibimi ullumikkut najugaqarfiit quliupput, tassaallutik kalaallit najugaqaqatigiiffii. Aamma tassani caféqarpoq klubbilu Angakkoq, tamarmik kalaallinit najugalinnit pulaartunillu atorneqartartut.

Sacha Malinský nammineq massakkut Nuummi angutaatinilu nipilersortartoq Jonas Lundsgaard Nilsson najugaqarput. Misigaalu Christiania aamma Kalaallit Nunaat arlalinnik assigiissuteqartut.

- Tassami maani Christianiami immikkut illuinnartumi assuarlerumatunnginnermik eqqarsartaaseqarpoq nunanilu assigiinngitsorpassuarneersoqarluni. Meeraallunilu sumiluunniit pinnguartoqarsinnaavoq biileqanngimmat kikkullu tamarmik imminnut nakkutigimmata. Tamanna aamma Kalaalit Nunaanni ilisarisinnaavara, Sacha Malinský oqarpoq.

Stjerneskibet aamma Christiania nutarterneqassapput

Stjerneskibip isuani qummukartaammiit Sacha Malinský-p qalipaaffianiit Christianiap ilarujussua takusinnaavaa, ilatigut Pusher Streetikoq, ukiuni qulikkaani arlalinni ikiaroornartunik tuniniaanermut eqqissiviiliornernullu qitiusimasoq.

Aggustimi 2023-mi Pusher Streetimi angut inupilunnut Hells Angels-inut attaveqartoq allaaneqarluni toqutaavoq, allallu pulaartut sisamat nalaatsortumik tamaaaniittut eqqorneqarlutik.

Christianiarmiunut tamanna naammaataalerpoq, isumaqatigiillutillu aqqusernup matunissaa aalajangerpaat.

Kingornatigut Christiania annertunerusumik allangortiterneqalerpoq, ilaatigut nunap ilaata eqqakkanik kuuffii illut arlaqaqisut nutarternerinut, tassunga ilaalluni  Stjerneskibet.

Sapaatip akunnerini pingasungajanni eqqumiitsuliortup Cheeky-p kuuissutigalugu Sacha Malinský-mik ateqartup Christianiami Stjerneskibip isua qalipaappa, ilaatigut qummukartaammit uanngaanniit. Assi © : Cheeky/Sacha Malinský

Alloriarnerlu siulleq tassaavoq illup isua qalipakkakkut nutaakkut kusanarnerulersinniarlugu. Eqqumiitsuliortoq nammineq neriuppoq siunissami Christiania eqqissisimananerulissasoq tamanullu orniginarnerulerluni. Aamma Stjerneskibimut tamanna atuuppoq. 

- Neriuppunga kalaallit allallu tapersersuissasut Christiania aamma Stjerneskibet atortassallugit. Taakkumi kulturikkut nalilissuupput pigiinnartariaqartut, Sacha Malinský oqarpoq.

Qalipagaq tallimanngorpat danskit nalunaaqutaat naapertorlugu nalunaaqutaq 14 atoqqaarfissiorneqassaaq illup saani kaffillernertalimmik.