Illersornissaqarfiup qulimiguuliat russit sorsuutaannit pyroteknikkimik eqqarfigineqarsimasoq

Russit sorsuutaata Illersornissaqarfiup qulimiguuliisa ilaat Gedserip avataani nunat tamalaat imartaani, pyroteknikkimik ataasinngormat eqqarfigineqarpoq.

Illersornissaqarfik tusagassiuutinut nalunaarummi paasissutissiivoq.

Qulimiguulik sorsuummik nalunaarusiornermut atatillugu assiliiniarnermi eqqarfigineqarsimavoq. 

Illersornissamut ministerip Jeppe Bruusip (Socialdemokratiet) pisoq annertuutut isigaa. 

- Tamanna ilungersunartorujussuuvoq. Tamanna Ruslandip tungaanit ulorianartorsiortitsinissamut piumassuseqarnerulersimanermik ersiutaavoq, ministeri oqarpoq. 

Jeppe Bruusip russit umiartornerlunnerarlugit ilassuteqarpoq. 

- Tamanna malitseqartariaqarpoq. Nunanut allanut ministeri russit ambassadøriannik oqaloqatiginnikkumalluni aggersaavoq, ministeri oqarpoq. 

Sorsuut kalerrisaarinermut imaani atorneqartartunik marloriarluni qulimiguulimmut eqqarsimavoq. 

Kalerrisaarutip aappaata qulimiguulik eqqunngilaarsimavaa. 

Illersornissamut ministerip oqarnera naapertorlugu, qulimiguulik ilaasulluunniit ajoqusersimanngillat. 

Russit ambassadøriata qaqugu oqaloqatigineqarnissaa suli ilisimaneqanngilaq. 

Illersornissamut ministerip russit aallartitaanik oqaloqatiginninnerup saniatigut allamik pisoqassangatinngilaa. 

- Nunat tamalaat imartaani pivoq. Ilungersunartutut isigaarput kisiannili tamatuma kingunerisaanik pissusilersuutitsinnik allanngortitsissanngilagut, tassa imatut paasillugu, susoqarnersoq malinnaaffiginissaa inatsisit naapertorlugit pisinnaatitaaffigigatsigu, aamma suliassaq taanna siunissami Illersornissaqarfiup suliarisassavaa, illersornissamut ministeri Jeppe Bruus oqarpoq. 

Illersornissaqarfik sakkutuut qulimiguuliat Fennecimik taaguutilik pineqarneranik paasissutissiivoq. 

/ Ritzau