Ilinniarnertuunngorniat naatsuliaralugit filmiliaat GUX Filmfestivalimi takuteqqaarneqalertut

- Suliarinera sivisungaatsiarpoq... Immiussat katillutik 40 minutsinik sivisussusillit atorlugit filmeeraliarput minutsinik tallimanik sivisussusilinngorlugu killorparput.

21-nik ukiullip Palleq Kristiansenip tusarnaartitsinermi immiussaq qarasaasiaq angallattagaatimini isiginnaarpaa.

Kiagoqaluni tumerparpaartoq immiussami isiginnaagaani takussaavoq.

- Filmeeraliarput nipilersortartunut Torluutikkunnut tunngasuuvoq, Palleq Kristiansenip sanilia 26-nik ukiulik Emanuel Frederiksen qarasaasiaq angallattagaq tikkuaatigalugu oqarpoq.

Marluullutik Nuummi ilinniarnertuunngorniarfimmi 3.g-eerput.

Taakkua soraarummeeqatissatillu aamma Nuummi Aasiannilu ilinniarnertuunngorniat allat 26-t aamma 3. g-eertullu tusagassiuutilerinermik ilinniartitsissummi soraarummeerutissatut filmeeraliatik pingasunngorpat GUX Filmfestivalimi takuteqqaassavaat.

Emanuel Frederiksen (saamerleq) aamma Palleq Kristiansen (talerperleq) tusagassiuutilerinermik ilinniartitsissummi soraarummeeqatissatillu naatsuliaralugu piviusulersaarusiaat nipilersortartut Torluutikkunnut tunngasuuvoq. Assi © : Johansinnguaq Olsen/ KNR

Ilinniartuunngorniat taakkua tusagassiuutilerinermik ilinniartitsissummi soraarummeerutissatut filmeeraliaat ilaqutaannut, kammalaataannut, soqutiginnittunut allanut taavalu naliliisussanut filmilortartuusunut takuteqqaarneqartussanngorput. 

Tamannalu Nuummi Kulturip Illorsuani Katuami pissaaq.

Taakkua filmiliaat qiiaammisaarnartuunngikkunik piviusulersaarusiaasut ukioq manna takuteqqaarneqartussat tamarmik naatsuupput. Takuteqqaarneqareerpata taakkunannga marluk, aappaa qiaammisaarnartuliatut aappaalu piviusulersaarusiatut suliarilluagaanerpaatut, naliliisartunit filmiliortartuusunit toqqarneqassapput. 

Suliarilluagaanerpaatut toqqakkat KNR TV-mi kingorna aamma aallakaatinneqassapput.

GUX Nuuk aamma GUX Aasiaat suleqatigiillutik ukioq manna GUX Filmfestivalernissamut aaqqissuussipput. Nuummiut pingasunngorpat aaqqissuussamut tassunga Katuami pingasunngorpat unnukkut arfinermiit pisussamut isiginnaariarnissamut isissutissarsisinnaapput. Assi © : Johansinnguaq Olsen/ KNR

Emanuel Frederiksenip Palleq Kristiansenillu soraarummeeqatissatillu Torluutikkut tusarnaartitsinerannik apersorneqarnerannillu immiussat atorlugit piviusulersaarusiaralugu filmiliaarartik nammineerlutik killorlugulu katiterlugu inaaqqammerpaat.

- Tulluusimaarnarpoq, pikkoreqigamimmi. Saqqummersitsinikuunngillat, tusarnaartitsigaangamilli torallaarsuaartarput, Emanuel Frederiksen oqarpoq.

Naatsuliaralugu piviusulersaarusiaminnik takutitseqqaarnissaminnut qilanaaginnarnatik aamma annilaangalluillu pissangapput.

- Qassinik isiginnaartoqassanersoq pissanngatigaara. Aamma ilaquttama qanoq igissaneraat, Palleq Kristiansen oqarpoq.

Nuummi Aasiannilu ilinniarnertuunngornianik peqataasoqassasoq

Nuummi ilinniarnertuunngorniat tusagassiuutilerinermik ilinniartitsissummi soraarummeertussat naatsuliaralugit filmiliaat GUX Awardsimik taallugu Katuami takuteqqaartitsisoqartareernikuuvoq. 

Taakkuali ulluunerani ilinniarnertuunngornianuinnarlu takuteqqaarneqartarnikuupput.

- Taava eqqarsarpunga, nuna tamakkerlugu takutittalerusullugit, tusagassiuutilerinermik GUX Nuummi ilinniartitsisoq Hanne Sørensen oqarpoq.

Taanna Nuummi Aasiannilu ilinniarnertuunngorniat filmiliaaraasa GUX Filmfestivalimik taallugu takuteqqaarneqarnissaannut aaqqissuusseqataasunut ilaavoq.

GUX Aasiaanni ilinniarnertuunngorniat marluk 20-nik ukiullit, Nick Møller aamma Ilasiaq Hansen, pingasunngorpat pisussamut qilanaarput. 

Taakkua Nuummi pingasunngorpat najuunnavianngilat, kisianni ilinniartuunngorniaqatitillu nittartakkakkut attaveqaatitigut toqqaannartumik malinnaassapput.

Nick Møllerip soraarummeerutissaatalu filmeeraliaat qiiaammisaarnartuuvoq.

- Arnamut aappassiaminik toqutsisartumut tunngasuuvoq. Inorersuuvoq, taanna ilinniarnertuunngorniaqataalu videoliuutikkut oqaloqatigigatsigit oqarpoq.

Ilasiaq Hansenip piviusulersaarusiaaraa kalaallip eqqumiitsuliortup inuunermut qanoq isiginneriaaseqarneranut tunngasuuvoq.

Nick Møller (saamerleq) aamma Ilasiaq Hansen (talerperleq) GUX Aasianni 3.g-eertuupput. Marluullutik tusagassiuutilerinermik ilinniaqatigiittarput. Assi © : KNR

Nick Møller piviusulersaarusiamilu takuteqqaarneqarnissaanut annilaangalaarpoq. Aamma filmiliortartunngorusuppoq.

- Filmiliorneq qangali soqutigisaraara, Ilasiaq Hansen oqarpoq.

Filmiliorneq meeraallunili soqutigisaraa.

- Kammalaatikkalu 700 koruunit missaanniugunarpoq akilimmik assiliissuteerarsigatta eqqaamavara, taanna oqarpoq.

Poqertut pikkorissaannagassat

Ilinniarnertuunngorniat filmeeraliornikkut oqaluttuaat GUX Filmfestivalimi isiginnaartunut takutikkusukkitik, Hanne Sørensen oqarpoq.

Nunatsinnimi filimiliorneq nunatsinni ukkatarineqarneruleraluttuinnarmat, inuusuttut aamma peqataatinnissaat pingaarpoq.

- Pingaaruteqarpoq inuusuttut takutinneqarnissaat qanoq qaammarsaaqataanissaat filmiliortarnerup tungaatigut. Uagut filmiliortartuusugut ilami utoqqaliarsaaleratta, Hanne Sørensen oqarpoq.

26-nik ukiulik Emanuel Frederiksen filmeeraliamik takutitseqqaartunut ilaaginnarnani GUX Filmfestivalimi saqqummiisartuussaaq. Assi © : Johansinnguaq Olsen/ KNR

Palleq Kristiansen aamma Emanuel Frederiksen Nuummi GUX-ereerunik filmiliornermik eqqumiitsuliornermillu suliaqarusupput.

Assersuutigalugu Palleq Kristiansen eqqumiitsuliortutut ilinniarnissamut qinnuteqaqqammerpoq.

Taamaammat GUX Filmfestivali soqutigilluinnakkaminnik suliaqarnissamik periarfissatsialaasoq, marluullutik isumaqarput.

- Tamakkuninnga suliaqarnissamik nunatsinni soqutiginnittunut taama aaqqissuussisoqartarnissaa pingaarpoq. Ingammik eqqumiitsuliornermik assigisaanillu nutaaliorlutik suliaqartartunut, Emanuel Frederiksen oqarpoq.

GUX Filmfestival Nuummi Katuami pingasunngorpat maajip ulluisa arfineq-pingajuanni unnukkut arfinermut aallartissaaq. Filmeeralianik takutitsinerup saniatigut eqquiniaatitsilluni makitsisoqassaaq kiuneranillu isertuussaagallartumik tupaallatsitsilluni takutitsisoqassaaq. 

Filmfestivalimut iserneq 50 koruuneqassaaq, ilinniartunullu 30 koruuneqassalluni. Filmfestivalimillu aaqqissuussaq Facebookimi toqqaannartumik aamma isiginnaarneqarsinnaassaaq.