Ilinniarnertuunngorniaq ersaartaanneqartoq: - Kalaaliunera tulluusimaarutigaara
Inuussutissarsiorneq pillugu ataatsimeersuarnerup, Future Greenlandip aallartinneqarnerani saqqummiinerup aappaa inuusuttut isiginninnerannut tunngassuteqarpoq.
Sulisitsisut pisortaata, Christian Keldsenip inuusuttut nunaminni siunissami inuussutissarsiornermut tunngatillugu oqaloqatigiinnermut ilanngunneqartarnissaat oqaatigaa.
Ilinniarnertuunngorniarfimmi ilinniartut marluk inuusuttunut ataatsimeersuartitsisoqarnerani, Future of Greenlandimi peqataasut saqqummiipput. Inuusuttunut ataatsimeersuartitsineq Sulisitsisunit sapaatit akunnialuisa matuma siorna aaqqissuunneqarpoq.
Uiloq Bakip Nuummi GUX-imi 1.g-mi ilinniartup inuusuttorpassuit nunatsinni susoqarnera ilisimalluarneraat apeqqutigisimallugu oqaatigaa.
Inuusuttut nunatsinni pissutsit ilisimasaqarfigivallaarnagit tamannalu pillugu oqaloqatigiinneq ajorlutik tassunga oqaatigaat.
Taamaammat inuussuttut nunatta siunissaa pillugu oqallinnermut peqataatinneqarnerussasut taanna isumaqarpoq.
- Sumiiffinni allani susoqarnera ilisimavaat, kisianni maani susoqarnera oqaluuserineq ajorpaat, taanna oqarpoq.
- Maani susoqarnera oqaluuserineqanngippat taava qanoq allannguisoqarsinnaava?
Inersuarmiittut nikuikaasut
Uiloq saqqummeereermat Veronica Nuummi GUX-imi 2.g-mi ilinniartoq saqqummiivoq.
Taanna ikinngutini Aviaaja Hansen sinnerlugu attortinnartumik oqalugiarpoq. Aviaaja oqalugiaatissamik allagaqartuuvoq, taannali ilinniarfimmini misilitsippoq.
Veronikap Danmarkimi kalaaliulluni inuusuttuunermi isummanik pigiliutiinnakkanik nutaanngilisunillu oqaaseqarfigineqartarnerup qanoq innera nassuiaatigaa.
Taassuma kalaaliunini allaat kanngusuutigisalerlugu.
Taassuma nunarsuarmi Kalaallit Nunaannut tunngatillugu ilisimasaqartoqannginnera eqqarsaatigigajuppaa. USA-p præsidentiata, Donald Trumpip taassumalu nunatsinnut sioorasaaruteqarnera nikanarsaataasut paasiuminaatsullu eqqaavai.
Kisianni, oqarpoq, 'kalaaliunera tulluusimaarutigaara' aamma 'kalaallit uagut akerliliinerit tamarmik isummallu pigiliutiinnakkat uaguunissatsinnut unitsitsissanngillat'.
- Kanngusunneq kinaassusitsinnut unitsitsissanngilaq.
Ataatsimoornissamik kissaateqarneq
Nunatta iliuuserisinnaasani pitsaanerpaaq iliuuserissavaa – tassa Trumpip tatisimanninneranit ataatsimoorneq ataatsimoornerullu pilersinneqartup ineriartortinnissaa, Veronica oqarpoq.
- Qanorluunniit pisoqaraluarpat nukittuffipput pingaarnerpaaq puigunngisaannassavarput.
- Imminut annaassanngilagut, kinaassuserput attatissavarput, taanna oqarpoq, naggasiillunilu:
- Aviaajamik ateqarpunga, 20-nik ukioqarpunga kalaaliuneralu tulluusimaarutigaara. Veronicamik ateqarpunga kalaaliunera tulluusimaarutigaara.
Inersuarmiittut sekundinik arlalinnik sivisussuseqartumik ersaartaallutik nikuikaapput.
