Ilatsiaq Markussen annanniuteqartarpoq kalerrisaaruteqarlunilu: Aalisartut allat taamaaliortariaqarsorai

Aalisartoq Uummannameersoq inuunermik annaassiniarneq pingaartippa. Inuit attaveqatigiittarfiani Facebookkimi allappoq.

Allattoq Ulrikke Andersen

juulip 29-at 2024 10:59

Aalisartoq uummannarmiu Ilatsiaq Markussen aalisarnermini sillimaniarneq pingaartillugu puttaquteqartarpoq, ajutuulernermilu nassitsissummik EPIRB-imik umiatsiaminiititaqarluni.

Ilatsiaq Markussenip aalisartut immami sillimaniarnissaat pingaartitaraa.

- Umiatsiami ingerlaarluta sukkasuumik ingerlasaratta, arfeqartarluni sikuaraqartarmat, Ilaatigullu kassut takujuminaassinnaasarlutik. Aporiataaraluarutta katataallutalu puttaqutip atugatta pullatteriaannap atornissaa pingaaruteqarami, taamaalilluta nakkaraluarutta puttaqut ingerlaannaq pullatsissinnaassagatsigu, Ilatsiaq Markussen oqarpoq.

ALLAASERISANI TULLERIIAARTUNI SAMMISAQ: ISUMANNAATSUMIK AASARSIORNEQ

Aasaanerani ilummukaasut asiartullu imaaginnalertarput.

Ilummukaaniartut asiarniartulluunniit ilagippatsit, taava isumannaalluaqqaarnissat pingaarpoq.

Tassalu isumannaatsumik aasarsiorneq allaaserisani tulleriiaartuni ulluni makkunani sammisassavarput.

Inatsisit naapertorlugit umiatsiami issimasunut tamanut akuerisaasunik puttaquteqartartussaavoq. Angalanermili puttaquteqarnissaq piumasaqaataanngillat.

Ilatsiaq Markussenilli puttaquteqartarnissani pingaartippaa. Ataasiakkaallu puttaquteqartarlersimasuttaaq aamma maluginiarpaa.

- Qujanartumik annanniuteqartartut amerlatsikkiartorput, Ilatsiaq Markussen oqarpoq.

Aamma atuaruk ASSIT: Annanniuteqartoqaraluaruni ajunaartukinnerussagaluartoq

POCA 770-mik umiatsiartaalerami aamma EPIRB ilanngullugu neqeroorutigineqarpoq. Neqeroorut akuerivaa. EPIRB umiatsiap kivileraluarnera ikinneqaruni umiatsiaq sorleq sumilu ajutoortoqarnersoq avammut ingerlaannaq nalunaarsuilissaaq.

- Kikkulluunniit angalasut puttaqut taanna atulissagaat taavalu pisinnaasut aamma EPIRB pigilissagaat innersuunnarpoq, Ilatsiaq Markussen oqarpoq.

Siumup angallatit kalerrisaaruteqassasut piumasaraa

Doris Jensen Siumumeersoq nunatta imartaani angalasut tamarmik ajutuulernermi nassitsissuteqarnissaata piumasaqaataalernissaanik Inatsisartut upernaaq ataatsimiinneranni siunnersuuteqarpoq. Inatsisartuni amerlanerussuteqartut isumaqataammata, Naalakkersuisut naalagaaffik attavigisussanngorpaat. Nunattami immakkut angalanermi isumannaallisaaneq oqartussaaffiginngilaa.

Naalakkersusiut kalerrisaarummik pisinermi tapiissuteqartarnissaat Inatsisartunit ukiamut oqallisigineqaqqissaaq misissueqquneqarput.

Ilatsiaq Markussenip immami sillimaniarneq pillugu inatsiseqalernissaa taperserpaa:

- Tamanna pitsaassooq, aamma iluaqutaassooq, uuma atornissaa ajornannginnami taavalu ajoqutaanani initunanilu, tigugaanni una aallartittaataa nusukkaanni ajakkaanni ingerlaannaq aallakaatitsilertussaagami, taava akuttunngittumik misileratarpara testianut pisillugu ajunnginnersoq.

Ajutoornermi kalerrisaarutit assigiinngitsut

EPIRB naalisagaavoq uunnga Emergency Position Indicating Radio Beacon

Toorlugu ingerlaannaq sumiiffimmik kalerrisaarisarpoq. Sivikinnerpaamillu akunnerit 48-it kalerrisaarisarluni. Immamut piguni ingerlaannaq aamma kalerrisaarissaaq. Annaassiniartut angallat sumiinneranik ingerlaannaq kalerrinneqassapput.

AIS naalisagaavoq uunnga Automatic Identification System

Angalasut allat imarsiornermi atortuanut sumiiffimmik ikiorneqarnissamillu pisariaqartitsillutik kalerriisarpoq.

Alla aamma periarfissaasoq tassavoq Spot, taanna tooraanni GPS-mi sumiiffiit iingerlaannaq ikiuisussanut kalerriutaavoq.

EPIRB MMSI kode-lereerlugu Nuuk Viking Servise APS-mi 6.995 koruuneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.