Ilaasortat Atlantikup avannaaneersut marloriaammik akissarsiaqartarnerat Folketingip siulittaasoqarfiani oqallisigineqartoq

Folketingimi ilaasortat Atlantikup avannaaneersut Folketingimit sulinngiffeqarnerminni marloriaammik akissarsisinnaanerisa periarfissaqartitaaneri maanna oqallisaalerpoq.

Folketingip siulittaasoqarfiani, Præsidietimi ilaasortaq, Danmarksdemokratineersoq Karina Adsbøl, folketingimut inatsisip allanngortinneqarnissaa pillugu aalajangiiffigisassatut siunnersuuteqarniarpoq. Taama Ritzau allaaserisaqarpoq.

-Isumaqarpugut tamanna naammaginanngilluinnartoq, Folketingimi ilaasortatut suliassanut suliaqarani, allami Inatsisartuni sulisarluni – marloriaammik aningaasarsiaqartitaasarluni. 

- Akileraarutinik atuilluarnerunngilaq, taama Karina Adsbøl Ritzau-imut oqarpoq.

Tamanna SF-ip tapersernerarlugu Ritzauimut ilisimatitsivoq.

-Isumaqarpunga danskit malittarisassaat Savalimmiormiut kalaallillu peqatigalugit tulluarsarneqartariaqarput, marlunnik suliffeqarluni aningaasarsiaqartitaasarneq atorunnaarsinneqassalluni, Karsten Hønge, SF-ip Folketingip siulitaasoqarfiani ilaasortaatitaa oqarpoq. 

Tatiginassutsimut tunngasoq

Inuit Ataqatigiit sinnerlugit Folketingimut ilaasortaq, Aaja Chemnitz, siulittaasoqarfimmut ilaasortaanngilaq, oqallinnerli malinnaaffigilluarpaa. Folketingimut ilaasortat Atlantikup avaannaaneersut sulinngiffeqarnerminni marloriaammik akissarsiaqarnissaminnut periarfissaqartitaannginnissaat isumaqataaffigaa.

- Sulinngiffeqarniarluni qinnuteqartoqaraanni, sulinngiffeqarnissaq naatsorsuutigineqartariaqarpoq, tassa akissarsiaqartitaanani sulinngiffeqarneq. Tamanna ilaasortaaqatitsinnut danskinut atuummat, tamanna ilaasortanut kalaaliusunut Savalimmiuneersunullu aamma atuutissasoq isumaqarpunga.

- Taamaattumik naligiissitaajumalluta oqaraangatta, allat allatut pineqarumallutik pineqaraangata, taava aamma naligiimmik pineqarnissaq pisariaqarpoq, tassa kalaallit Folketingimi ilaasortat Inatsisartunut ilaasortaatillutik akissarsiaqaratik sulinngiffeqartariaqarlutik, taanna oqarpoq.  

Aaja Chemnitz Inatsisartuni Folketingimilu 2014-imi piffissami sivikitsumi ilaasortaavoq. Folketingimiit taamaallaat akissarsiaqarnissani taamani toqqarsimallugu paasissutissiissutigaa.

- Politikeritut tatiginassuserput annaasinnaavarput. Innuttaasunit qinikkatut, innuttaasunut takutitsineq immikkut eqqumaffigineqartariaqarpoq, Aaja Chemnitz oqarpoq.

Folketingimi taamaallaat

Inatsisartunit akissarsiaqartitaalluni sulinngiffeqarnissaq nunatsinni periarfissaanngilaq. Ritzaup allaaserisaa naapertorlugu Savalimmiuni inatsimmik allannguisoqalerpoq. Lagtingimut qinerseqqittoqareerpat, Folketingimut ilaasortaagaanni, akissarsiaqaatigaluni Lagtingimiit sulinngiffeqarnissaq periarfissaajunnaassaaq.

Folketingili tassuuna allaanerussuteqarpoq, sulinngiffeqarnerup nalaani marloriaammik akissarsiaqarnissaq periarfissaammat.

Aki-Matilda Høegh-Dam Naleqqameersoq Inatsisartut ukiakkut ataatsimiinneranni Folketingimi ilaasortatut septembarimi akissarsiaqarluni sulinngiffeqartitaavoq. Tamatuma saniatigut Elvira Kûitse (N) Høegh-Damimut Folketingimi sinniisuunermini aamma akissarsiaqarpoq. Taama Ritzau allappoq.

Aki-Matilda Høegh-Damip Folketingimi suliani ataasinngorpat nangeqqissavai. 

Aki-Matilda Høegh-Dam KNRip apersorniaqarluarpaa. Periarfissaasimanngilarli ,allallunili oqallisaasoq pillugu ima akissuteqarpoq:

- Isumaqarpunga tamanna Danmarkimi suliassaasoq danskit partiivisa Folketingillu siulittaasoqarfiata suliarisariaqagaat. Taakkuukua inatsisartui malittarisassaallu, taamaattumik taamaattumik pisariaqarsorinngilara nunannut, Folketingimi ilaasortatut piginnaatitaaffikka tunngavigalugit oqaaseqarfigissallugit,  tamannami nunatsinnut attuumassuteqanngilaq, innuttaaqatima pisinnaatitaaffiinut, imaluunniit Inatsisartut aaqqissuussaaneranut tunngassuteqarani. 

- Inatsisartut namminneq pisinnaanertik aallaavigalugu naleqqussarsinnaaneri ataqqivara, aamma uagut inatsisartutta assinganik ataqqineqarnissaat naatsorsuutigaara, Aki-Matilda Høegh-Dam allappoq.

Inatsisartut aningaasarsiaasa allattorsimaffiat naapertorlugu, Inatsisartunut ilaasortat apriilip aallaqqaataanit 2024-mit qaammammut 48.291 koruuninik aningaasarsiaqartitaapput.

Folketingimit ilaasortat soraarnerussutisiassat ilanngullugit qaammammut 70.906 koruuninik aningaasarsiaqartitaapput. Akissarsiat taakku ataatsimoortikkaanni qaammammut 119.197 koruuniupput.