Ikiorsiissutit Gazamut tulaanneqarsinnaanissaat USA-p sulissutigigaa
Gazamut ikiorsiissutit anngussinnaanissaat pillugu Gazami tulattarfiugallartussamik sanaartornialersaarnertik, USA-p præsidentiata Joe Bidenip marsip qaammataani ilisimatitsissutigaa.
Pingaartumik imermik, nerisassanik nakorsaatinillu pisariaqartitsisoqarpoq. Gazami kaannersuaqalersinnaanera Naalagaaffiit Peqatigiit peqqissuunissaq pillugu suleqatigiiffiata WHO-p mianersoqqussutiginikuuaa.
Allattoq Mads Lynge
apriilip 26-at 2024 13:08
Amerikamiut Gazami maanna tulattarfiliuleruttorput, ikiorsiissutit Gazamut taamaasillutik tulaanneqarsinnaalissallutik.
USA-p illersornissamut ministereqarfia Pentagon taama ilisimatitsivoq. Nutaarsiassaqartitsivik Reuters taama allaaserisaqarpoq.
Tulattarfittaassap maajimi naammassineqarnissaa naatsorsuutigineqarpoq.
Amerikamiut sakkutuui Gazap sineriaata avatinnguaniilerput.
Gazamut ikiorsiissutit anngussinnaanissaat pillugu Gazami tulattarfiugallartussamik sanaartornialersaarnertik, USA-p præsidentiata Joe Bidenip marsip qaammataani ilisimatitsissutigaa.
Nutaarsiassaqartitsivik Ritzau taama allaaserisaqarpoq.
Kaannersuaqalernissaa pinngitsoortinniarneqartoq
Gazami qaammatini arfinilinni sorsuttoqareersorlu kaannersuaqalinnginnissaa taamaaliornikkut pinngitsoortinniarneqarpoq.
Gazap sanaqqinneqarnissaa pillugu amerikamiut umiarsuaat Gazap nalaaniitsinneqartut, Pentagonip oqaaseqartitaata Pat Ryderip oqaatigaa. Assersuutigalugu tulattarfiliortoqarnerata nalaani ikiorsiissutit Gazamut allatigut apuunneqartariaqassasut taassuma aamma ilisimatitsissutigaa.
Pingaartumik imermik, nerisassanik nakorsaatinillu pisariaqartitsisoqarpoq. Gazami kaannersuaqalersinnaanera Naalagaaffiit Peqatigiit peqqissuunissaq pillugu suleqatigiiffiata WHO-p mianersoqqussutiginikuuaa.
