ICC amerlanernik tapiiffigineqassanngilaq

Inuit Issittormiut Siunnersuisoqatigiiffiata ICC-p amerlanerusunik tapiiffigineqarnissaanik siunnersuut, Inatsisartuni amerlanerussuteqartut sisamanngornermi itigartippaat. Nittartakkami Sermitsiaq.AG-mi tamanna allaaserineqarpoq.
Allattoq Mads Lynge
apriilip 25-at 2014 14:54

ICC-mut tapiissutit 2015-imi 2 millionit koruuninik amerlineqarnissaat, Aqqaluaq B. Egedep IA-meersup Inatsisartuni siunnersuutigaa.

Siunnersuulli Siumup, Atassutip Demokraatillu itigartippaat, Inuit Ataqatigiit Partii Inuillu siunnersuut taperseraat.

ICC-p aningaasanik atuinini eqqarsaatigeqqittariaqaraa Demokraatit isumaqarput.

- ICC-p aningaasaatiminik qanoq atuinini nalilersortariaqarpaa. Akissarsiat qaffasippallaarpat? Angalasoqarpallaarpa aamma akikinnerusumik angalasoqarsinnaava?  Demokraatit oqaaseqartuat Michael Rosing aperivoq.

Aqqaluaq B. Egedep siunnersuutaa Partii Inuit ilalerpaat, Demokraatilli assigalugit ICC-p aningaasartuutai eqqarsarnartoqartillugit.

- Siulittaasup akissarsiaqartinneqarnera qaffasissumik inissitaasoq Partii Inuit maluginiarpaat. Tamatumunnga atatillugu Partii Inuit ICC-mut kaammattuutigerusuppaat, aningaasakilliornermut atasumik, aningaasartuutitik nalilersuiffigeqqeqqullugit, Partii Inuit sinnerlugit oqaaseqartoq Randi Broberg ilaatigut oqarpoq.

ICC aningaasanik allatigut isertitassarsiortariaqartoq Siumup Atassutillu oqaatigeqqippaat.

Inuit Ataqatigiit aamma piumasaqaatitaqanngitsumik ICC aningaasanik tuniumanngilaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq