IA-p nunatsinni tamat oqartussaaqataanerat inerisimanngitsuunerarpaa
Naalakkersuisooqatigiit akuersaanngilluinnarnissamik atorunnaarsitsinissaq siullermeerinninnermi ilungersorlutik akueritinniarsarigaluarpaat ataatsimiititaliamullu suliassanngortikkusunnagu. Hans Enoksenip Kristian Jeremiassenillu Siumup qullersaanut akerliliineriinnaasigut ataatsimiititaliami suliarineqarnissaa iluatsinneqarpoq.
-Ataatsimiititaliami suliarinninneq tunngavigalugu Inatsisartut periarfissaqalissapput aala-jangiiffigisassatut siunnersuut pillugu allannguutissanik aammalu isumaliutissiissummik saqqummiissallutik. Isumaliutissiissummi tassani siunnersuutip kingunissai assigiinngitsut allaatigineqarsinnaapput Inatsisartunut ilaasortat tamarmik taasinermi kingunerisassai suunersut paasiniassammatigit, Naaja Nathanielsen aamma Sara Olsvig oqarput.
IA-meersut isumaqarput naalakkersuisooqatigiit ammasumik naalakkersuinikkut oqallittoqarnissaa siooragigaat, pissutsillu piviusut pillugit paasinnissorinninnertik kisiat ukkataralugu. Taamaammat IA-p ataatsimiititaliami suliarineqarnerani aalajangiiffigisassatut siunnersuutip aappassaaneerneqannginnerani tusarniaassutigineqarnissaa piumasaqaatiginiarpaa.
-Inuit Ataqatigiit taamaasilluta oqartariaqarpu-gut nunarput partiinit amerlanerussuteqartunit demokrati pillugu ikkattorujussuarmik paasinnittaaseqartunit aqunneqartoq. Siullermik nalunaarusiat assigiinngitsut tusarniaas-sutigineqarnissaat itigartitsissutigaat. Maannalu tassa naalakkersuinikkut illuatungiliuttut tusaajumanngilluinnarpaat, IA-meersut malruk nassuiaapput.