GME: Uranimik avammut nioqquteqanngikkutta suliniut akilersinnaanavianngilaq
Danskit aviisiata, Greenland Minerals and Energymi pisortaaneq Roderick McIllree oqaloqatigisimavaa. Taanna Kuannersuarni piiavimmik ammaanissaminik neriuuteqarpoq. McIllree apersorneqarnermini naqissuserpaa Inatsisartut uranimik akuersinissamik taasinissaat piiaaliviliortoqarnissaanut aalajangiisuulluinnassasoq.
- Suliniut uranimik avammut nioqquteqarfiunani ingerlanneqassappat imminut akilersinnaassava? Naagga. Suliniut nunani tamalaani niuerfimmi unammillersinnaassappat, aatsitassanit nioqqutissiassanit isertitsiffiusinnaasut tamaasa pisariaqartinneqassapput Roderick McIllree, aatsitassarsiorfiup pisortaanera Politikenimut taama oqarpoq.
Australiamiut suliuffeqarfiutaata GME-p siornatigut nassuiaatigisimavaa Kuannersuarni suliniummit isertitat ilarpassui uranimik piiaanermeersuussasut. Inatsisartullu ukiakkut ataatsimiinnissaat sioqqullugu pisortaanerup eqqaasitsissutigaa, uranimut akuersaanngilluinnarnik Inatsisartunit atorunnaarsinneqanngippat Narsami piiaaviliortoqarnavianngitsoq.
Nunatsinni aatsitassarsiornissaq pillugu paasissutissat nutaat danskit aviisianni aamma sammineqarput. Tassalu aatsitassanik qaqutigoortunik immikkoortiterivissaaq Danmarkimut inissinneqaratarsinnaanera.
- Aatsitassanik qaqutigoortunik immikkoortiterivissaq Danmarkimut inissikkusupparput, taamaaliornikkut Europami niuerfimmut tamarmut pilersuisinnaanngorluta, Roderick McIllree Politikenimut oqarpoq.
Elektronikkimik suliffeqarfissuit ilaat Danmarkimi Tysklandimilu suliffissuaqarput: Vestas, Grundfos, Mercedes aamma Siemens.