GHF-imi assortuuttuarsinnarput

Siulersuisuni ilaasortat sinneruttut nunatsinnilu timersoqatigiiffinneersut arlallit akornanni e-mailikkut allaqatigiinneq kissaammeqqaffiusup takutippaa, GHF-ip ikiligaanera sivisoorsuarmik mamikkiartussagunartoq.

GHF-ip siulersuisuini ilaasortat sinneruttut pingasut suleqatigisassaannik sinniisussanik marlunnik aggersaasoqarsimavoq, GHF-imilu immikkut ittumik ataatsimeersuarnissaq maanna piareersarpaat.

Tamannali isumaqatigiinnginnermut aaqqiissutaasinnaassanersoq ilimanrpallaanngilaq, timersoqatigiiffiimmi aqutsisuisa siulersuisunullu ilaasortat akornanni pisuuteqattaannerit ima sakkortutigaat, GHF-imi assortuunnerit qaangerneqarnissaat takujuminaatsupilussuulluni.

Tamanut ammasumik, soqutisaqaqatigiit tusagassiortullu tamatumunnga peqataarusunngitsut malinnaaffigisaannik kamaattoqarnera, timersuummut Kalaallit Nunaata ukiorpassuarni tulluusimaarutigisimasaanut sukkasuupilussuarmik aserorsaataalersinnaavoq.

Kamaannaq suli killilerneqanngilaq, aamma siunissami qanittumi saammaateqatigiittoqarnissaa ilimananngilaq. Timersoqatigiiffiit soqutigisaat inuillu ataasiakkaat imminnut kamaanneri timersuummut aserorsaataavoq, timersortartunullu, aqutsisunut assammillu arsarnermik nuannarisalinnut iluaqutaanngilluinnarluni.