Gazami ikiuigasuaatinik agguaanermi uivertuni inuit 47-t aallaaneqartut
Gazami agguaavimmi, marlunngornermi palæstinemiunut ikiuigasuaatinik agguaasoqarnerani inuit 47-t aallaaneqarlutik ikilerneqarput.
Reuters naapertorlugu, Naalagaaffiit Peqatigiit inuit pisinnaatitaaffii pillugit allaffeqarfia paasissutissiivoq.
Israelimiut sakkutuui aallaasersortuusut Naalagaaffiit Peqatigiit oqarput.
Gazami Hamasip naalakkersuisuisa tusagassiorfinnut allaffeqarfia naapertorlugu, agguaassinermi inuit pingasut toqutaasut, tusagassiorfik Al Jazeera allappoq. Tamanna Naalagaaffiit Peqatigiinniit allanilluunniit tusarfinniit arlaannaannulluunniit attuumassuteqanngitsunit uppernarsarneqanngilaq.
Ikiuigasuaatit amerikamiunit tapersersorneqartumit Gaza Humanitarian Foundationimit (GHF) agguaanneqarput.
Ikiuigasuaatinik agguaanermi uivertoqarsimaqisoq, Naalagaaffiit Peqatigiit qullersaata António Guterresip oqaaseqartartua marlunngornermi oqarpoq.
- Gazami agguaasarfiliat ilaannit videomik takusaqarpugut. Ilumoorluinnarpungalu videot assillu taakku aliatsannarluinnartuupput, Naalagaaffiit Peqatigiit oqaaseqartartuat Stéphane Dujarric marlunngornermi unnukkut oqarpoq.
Nerisassaalatsineq
Taanna naapertorlugu inuit tuusintilikkuutaat ikiuigasuaatinik agguaasarfiliamukaapput.
Ikiuigasuartarfiliami inuit siuleriaakkunnaaginnarlutik imminnut ajattaatilersimasut, isiginnittuusoq nutaarsiassaqartitsivimmut AFP-mut oqarpoq. Agguaasarfiliamulli qerlertoruunniarsaripput tigusinnaasaminnik tigusiniarsaralutik.
Gazami ikiuigasuaatinik mattussineq sapaatip-akunnera kingulleq atorunnaarsinneqarpoq. Mattussineq marsip aappaanni aallartippoq, sorsuffiusup nalaani nerisassanik allanillu pisariaqartinneqartunik navianartumik amigaateqalernermik kinguneqarpoq.
Naalagaaffiit Peqatigiit ikiuniaqatigiiffiillu assigiinngitsut arlallit, GHF-imik ikiuigasuaatinik marlunngornermi agguaasuusunik suleqateqannginnerarput.
Suliniaqatigiiffiup ikiuigasuaatinik agguaanermini Gazap ilaani inuit minillugit allat tuniorarnerisigut, sulinini naalakkersuinermut attuumassuteqalersinniaraa taakku isumaqarput.
/ritzau/
