Frankrigip præsidentia Macron inatsisartunut qinersinissamik nalunaaruteqartoq
Frankrigip præsidentiata Emmanuel Macronip partiia Europa-Parlamentimut ippassaq sapaammi qinersinermi angusarissaarpallaanngereersorlu, Frankrigimi inatsisartunut qinersisoqartussanngorpoq.
Macron qinersinermi ajorsareerluni taama qisuariaateqarpoq, Frankrigimi inatsisartunut juunip ulluisa 30-anni qinersisoqartussanngorluni.
Ippassaq sapaammi unnukkut oqalugiarnermi tamanna nalunaarutigaa.
Emmanuel Macronip politikkikkut unammillertaata talerperliuniap Marine Le Penip partiia National Forsamling(RN), Europa-Parlamentimut qinersinermi annerpaanngorpoq, 31,5 procentinit taaguunneqarluni.
Macronip naalakkersuisoqatigiivi qiterliuniat 15-it procentinit taaguunneqarput.
Qinersinermi inernerit tusaanngitsuusaaginnarsinnaanagit, Macronip ippassaq sapaammi oqaatigaa. Partiiata qinersinermi angusarissaarpallaannginnera taassuma nassuerutigaa:
- Aalajangerneq ilungersunarpoq artornarlunilu, tatiginninnermilli takutitsineruvoq. Tassa ilissinnut nunaqqatinnut tatiginninnermik takutitsineruvoq, præsidenti taama oqartoq nutaarsiassaqartitsivik DPA allappoq.
Frankrigimi inatsisartunut qinersinerup immikkoortua siulleq juunip ulluisa 30-anni pissaaq, qinersinerullu immikkoortuata aappaa juulip ulluisa arfineq-aappaanni pisussatut pilersaarutigineqarluni.
