EU-mi siuttut Issittumi isumannaallisaanerup qanoq pitsanngorsarneqarnissaa eqqartussagaat

Issittumi isumannaallisaaneq silallu pissusiata allanngoriartornerata malitsigisaanik avannamut nutaanik angallavissaqalernerani pissaaneqarnerulerniarluni anneruniuunneq, Finlandimi issittoq pillugu ataasinngornermi ataatsimeersuarnermi sammineqassapput.

EU-p nunanut allanut tunngasunut pisortaa, Kaja Kallas, ataatsimiinnermut apuukkami taama oqarpoq.

- Ruslandip avannaarsuani sakkutooqarfiit rakettinik missilinik misileraanerminut atatillugu ammaqqippai. Tamannalu ilutigalugu silap pissusiata allanngoriartornera Issittumi imaatigut angallavissanik nutaanik ammaassivoq.

- Tamatuma malitsigisaanik nunap immikkoortuani  pissaaneqarniunnerit annertusiartuinnarnerat ersarippoq, Kaja Kallas oqarpoq.

Taassuma EU-Kommissionip Issittoq pillugu periusissiassaata ilaa ataatsimiinnermi oqaluuserissavaa, peqataasullu ilagaat Danmarkimi ministeriuneq Mette Frederiksen (S).

Issittoq aalajangeeqataalluinnartoq 

Mette Frederiksen tusagassiortunut nalunaarummi ataatsimiinneq sioqqullugu ima oqarpoq: 

- Issittoq Europamut Europamilu isumannaallisaanermut aalajangeeqataalluinnarpoq. Taamaattumik patajaatsuunissamut, isumannaatsuunissamut ineriartornissamullu EU-p nunap immikkoortuani iliuuseqarnerunissaa aningaasaliissuteqarnerunissaalu pisariaqarpoq.

- Finlandimi suleqatikka ullumi ataatsimeersuaqatigineranni eqqartornissaa qilanaaraara, Mette Frederiksen oqarpoq.

Kalaallit Nunaalli ataatsimeersuaarnermi oqallisigineqassanngilaq, Kallas oqarpoq. 

- Kalaallit Nunaat toqqaannartumik oqaluuserissagunanngilarput, Issittoq nalinginnaasumik pinerugatsigu. 

- Eqqaaneqassajunnarsivorli, isumannaallisaaneq silallu pissusiata allanngorneriartornera, nunap immikkoortortaanut pissaaneqarniulluni politikkimik pilersitsut pillugit, ataatsimoornitsinnik takutitsinissarput pingaaruteqarpoq, Kallas oqarpoq. 

Issittumi periusissaq nutaaq

Taassuma EU-Kommissionip Issittumi periusissiassaa suli isertuukkallarpaa.

- Suli saqqummiussinnaanngikkallarpara. Oqaluuserisassat ilaat ullumikkut oqaluuserissavagut, aamma Finlandip ministeriunera siunnersuuteqassasoq naatsorsuutigaara.

- Issittumi piginnaasassat pisariaqartinneqartut aamma eqqartussavagut. Soorlu sikunik aserorterutit, Kaja Kallas oqarpoq.  

EU-Kommissionip siulittaasua Ursula von der Leyen Mette Frederiksen peqatigalugu sapaatip akunnerata siuliani nunatsinniippoq. 

Von der Leyen EU-mit 1,5 milliardit koruuninik tapiissutinik nunatsinnut nassataqarpoq. Tamanna nunatta EU-mut qaninnerulersinnissaanut iliuuserineqartutut isigineqarpoq, piffissami USA-p, Ruslandip Kinallu nunatsinnut soqutiginnileruttorneranni.   

Nunatsinnut sapaatip akunnerata siuliani tikeraartoqarmat nunap immikkoortuanut periusissiassaq aamma erseqqissarneqarpoq. 

Nunat tamalaat akornanni suleqatigiinnissamut EU-kommissæri Jozef Síkela Nuummiinnermini oqarpoq:

- Issittoq Europamut silap pissusiatigut, sillimaniarnikkut aningaasaqarnikkullu toqqaannaq sunniuteqarpoq. Tamanna periusissiassatsinni eqqarsaatigineqassaaq.

- Periusissiaasimasoq issittumi silap pissusianut inuinullu tunngatinneqarnerusimavoq. Nunarsuarmili pissaanillit politikkiat pissutigalugu sillimanerulernissaq aningaasaqarnerulernissarlu ukkatarinerusariaqarlugit paasivarput, Jozef Síkela oqarpoq. 

/ Ritzau