Erfalasut qiteqqunneqarnerannut allagaq amerlasuunit qisuariarfigineqarpoq
Danmarkip tyskinit tiguagaanera apriilip qulingiluaanni 1940-mi eqqaaniarlugu, nunatsinni pisortat allaffeqarfii arlaqartut erfalsui ippassaq qiteqqusimatinneqarnerat, Nikku Olsenip tusagassiuutinut nalunaaruteqarluni qisuariarfigaa.
- Inuiannut danskinut maniguutiinnarneruvoq, Partii Inuit siulittasuat taama allappoq.
- Danskit soqutigisaannut maniguuttunngorsangaaneq sutigut tamatigut anngaajuartillugu nammineq naalagaaffinngornissarput ungasillingaluttuinnassaaq, tamatumunngalu Partii Inuit ersarissumik akerliuvugut, Nikku Olsen tusagassiuutinut nalunaaruteqarluni taama allappoq, eqqaasitsissutigalugulu - Danmark tyskinit tiguagaanerata nalaani Danmarkip Kalaallit Nunaatalu akornanni attaveerummat.
Aviisip Sermitsiaq.Ag-ip nittartagaani atuartartut qisuariaataat - ilanngutassiap uuma allanneqarnerata nalaani 151-it qisuariarlutik allagaqarput - atuartartut allattut ilaata eqqaasitsissutigaa - Danmark Tyskinit tiguagaanerata nalaani kalaallit umiartortut ajunaarsimammata.
Søren Thalund nammineq isummani malillugu isumatusaartumik Nikku Olsen-imut siunnersuteqarpoq - tassalu danskit Kalaallillu erfalasulertarnerinik assersuuteqarluni.
Søren Thalund-ip Partii Inuit siulittaasua kaammattorpaa - Danmarkimut siunnersuuteqassasoq - kalaallit inuiattut ullorsiornerani Danmarkimi kalaallit erfalasuat amuneqartassasoq aamma Savalimmiormiut juulip ulluisa 28-anni inuiattut ullorsiorneranni taakkua erfalasuat amuneqartassasoq.
Søren Thalund-ip kaammattuuteqarnermini takorloorpaa - inuiattut ullorsiornermi folketingip ataatsimiittarfiata Christiansborgip erfalasulerfiani kalaalit erfalasuat amuneqartassasoq.
Apriilip ulluisa qulinguaanni Danmark tyskinit tiguagaaneranit ukiut 74-it qaanngiupput aamma Kalaallit Nunaata USA-mit illersoneqarnissaanik isumaqatigiissut, Danmarkip Washington-imi aallartitaannit, Henrik Kaufmannimit atsiorneqarneranit ukiut 73-it qaangiupput.
Isumaqatgiissuteqarnermi USA nunatsinni sakkutooqarfinnik sanaartorsinnaaneranik periarfissinneqarpoq - taamanikkut Kalaallit Nunaat danskinit nunasiaataavoq.
