Elvira Kûitse Aki-Matildamut Folketingimi sinniissunngussaaq

Aki-Matilda Høegh-Dam Naleqqameersup sulinngiffeqarnissaa Folketingimit akuerineqarpoq. Sinniisussaa Elvira Kûitse Naleraq sinnerlugu Folketingimut ilaasortanngorpoq.

Allattoq Ann-Sophie Greve Møller

septembarip 18-at 2025 09:11

Nutserisoq Medea Olsen

Inatsisartut ukiakkut ataatsimiinnerat tallimanngorpat aallartippat Aki-Matilda Høegh-Dam Naleqqameersoq peqataasussat ilagaat.

Novembarip 14-ani ukiakkut ataatsimiinnerup naanissaata tungaanut Folketingimi ilaasortaanerminit sulinngiffeqarsinnaanissaa akuerineqareersorlu tamanna pissaaq.

Folketingimi sinniisussaarivaa Elvira Kûitse. Taanna Siumumi politikeriunikuuvoq, Folketingilli nittartagaa naapertorlugu Naleraq sinnerlugu Folketingimut sinniisussatut ilaasortanngorpoq.

Elvira Kûitse sinniisussatut pingajuuvoq. Markus E. Olsen, Aki-Matilda Høegh-Damimut sinniisuutitaq siulleq, septembarip aallartinnerani kannguttaatsuliorsimasutut eqqartuunneqarpoq.

Eqqartuussut pissutigalugu Markus E. Olseni Folketingimi sinniisuunnginnissani aalajangerpaa. Tamanna Altinget-imut oqaluttuaraa.

Imminnut tapertariit

Aki-Matilda Høegh-Dam naapertorlugu Inatsisartut ukiakkut ataatsimiinnerat naammassippat Folketingimi sulinini aallarteqqissinnaassavaa.

- Ataatsimiinneq naammassippat Inatsisartuniikkunnaassaanga, aatsaat upernaakkut ataatsimiinnermi nutaamik siunnersuuteqartussaavunga. Qaammatit arlallinni susoqanngipajaalerpoq. Aamma isumaqarpunga Inatsisartuni Folketingimilu sulineq imminnut tapertariilluartut, Naleqqami politikeri oqarpoq.

Taamaattumik Folketingimi ilaasortaaginnarnissani pilersaarutigaa.

- Pisussaaffigaarami. Tamanna pillugu inuit qinerpaannga, Aki-Matilda Høegh-Dam oqarpoq ilassutigalugulu Folketingimut qinersisoqaqqilerpat qinigassanngortinnaviarnani.

Inatsisartunut qinersisoqarnissaa nalunaarutigineqanngikkallarmat Aki-Matilda Høegh-Dam Radio III-mut oqarpoq Inatsisartunut qinigaassaguni Folketingimi ilaasortaajunnaarnissani naatsorsuutigalugu.

Qinersinissaq 2026-mi ukiakkut pissaaq, novembarillu aallaqqaataa 2026 sioqqullugu Folketingimut qinersisoqassaaq.

Folketingimut ilaasortat sulinngiffeqarnerminni qaammammut 71.000 koruunit missaanni aningaasarsiaqartarput. Inatsisartunut ilaasortat qaammammut 50.000 koruunit missaanni aningaasarsiaqartartarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.