Elon Muskip Canadamiusut innuttaassuseqarunnaarnissaanut atsiornerit 250.000-t katersorneqarsimalereertut

Aningaasaatilissuup Elon Muskip Canadamiusut innuttaassuseqarnerata atorunnaarsinneqarnissaa pillugu Canadami innuttaasut akornanni atsiornernik katersinerit maanna 250.000-nngorput.

Elon Musk Sydafrikami illoqarfimmi Pretoriami inunngorpoq, Canadamilu kingorna nunassippoq, anaananilu Maye Musk aqqutigalugu Canadamiusut aamma innuttaassuseqalerluni. Maye Musk Canadami nunap immikkoortuani Saskatchewanimeersuuvoq.

Elon Musk Canadap soqutigisaanut akerliusumik iliuuseqartarsimanerarlugu Canadamiusut innuttaassuseqarnerata atorunnaarsinneqarnissaa pillugu Canadami innuttaasut akornanni atsiornernik katersisoqarpoq.

Musk naalakkersuisunut Canadap nammersortuuneranik innarliisinnaasunut ilaasortanngornikuuvoq, atsiornernik katersisut ilaatigut oqarput.

Elon Musk atsiornernik katersineq quiassuaatigalugu inoqatinut attaveqaqatigiittarfikkut X-ikkut allaaserisaqarpoq, Canadalu nunaviunngitsutut ilaatigut taallugu.

Donald Trumpimik tapersersuinini arlaleriarluni oqaatigisarpaa, Canadallu namminersortuunera aamma apeqqusersimallugu, soorlu aamma Canadami politikerit illaaruaatigisarsimagai, Canadallu USA-mut ilannguttariaqarnera arlaleriarluni tunngavilersuutigisarsimagaa.

Inuk peqquserluttuliorsimappat, nunasinissamut qinnuteqarnermi salluliorsimappalluunniit, nunamiluunniit allami assersuutigalugu Canadamut sakkulersortumi sakkutuujusimappat Canadamiusut innuttaassuseqarnera atorunnaarsinneqarsinnaasoq Canadami naalakkersuisut oqaatigaat.